ٹرمپ سے ملاقات کے باوجود ظہران ممدانی اپنے مؤقف پر ڈٹے رہیں، عوامی مسائل کے حل پر زور

واشنگٹن میں امریکی صدر ڈونلڈ ٹرمپ اور نیویارک کے نو منتخب میئر ظہران ممدانی کے درمیان دوستانہ ملاقات ہوئی، تاہم ممدانی اپنے سابقہ بیانات پر قائم ہیں۔ انہوں نے کہا کہ وہ اب بھی ٹرمپ کو ’فاشسٹ‘ اور ’آمر‘ سمجھتے ہیں۔

این بی سی کے پروگرام ’میٹ دا پریس‘ میں گفتگو کرتے ہوئے ممدانی نے وضاحت کی کہ انتخابی مہم کے دوران ٹرمپ کے بارے میں دیے گئے سخت بیانات آج بھی ان کے موقف کی عکاسی کرتے ہیں۔ 

تاہم انہوں نے اس بات پر زور دیا کہ عوامی مفاد کے لیے اختلافات کے باوجود مل کر کام کیا جائے، تاکہ نیویارک کے شہریوں کے روزمرہ مسائل جیسے مہنگائی، رہائش اور دیگر معاشی مشکلات حل ہو سکیں۔

ممدانی نے کہا کہ وہ ٹرمپ انتظامیہ کے ساتھ عملی اور مثبت تعلقات چاہتے ہیں تاکہ شہریوں کے مسائل کو ترجیح دی جا سکے۔ ملاقات کے دوران ایک موقع پر ٹرمپ نے مذاق میں ممدانی کے ’فاشسٹ‘ کہنے والے تبصرے پر بات کی، جس پر دونوں رہنما ہنس پڑے۔

واضح رہے کہ انتخابی مہم کے دوران ممدانی اور ٹرمپ کے درمیان سخت لفظی جنگ دیکھی گئی تھی، اور ٹرمپ نے کئی بار ممدانی کو ’کمیونسٹ ذہنیت کا حامل‘ قرار دیا اور وفاقی فنڈز روکنے کی دھمکیاں بھی دی تھیں۔