پشاور ایف سی ہیڈکوارٹرز حملے کے دہشتگردوں کی شناخت، تینوں افغان نکلے

پشاور میں فیڈرل کانسٹیبلری ہیڈکوارٹرز پر حملہ کرنے والے دہشت گردوں کی شناخت کرلی گئی ہے، جبکہ پولیس نے واقعے کی ابتدائی رپورٹ بھی مرتب کرلی ہے۔

سیکیورٹی ذرائع کے مطابق تحقیقات میں یہ بات سامنے آئی ہے کہ مارے جانے والے تینوں حملہ آور افغان شہری تھے، جن کے قبضے سے اسلحہ اور گولہ بارود بھی ملا ہے۔

پولیس رپورٹ میں بتایا گیا ہے کہ ایک خودکش بمبار سنہری مسجد روڈ کی جانب سے پیدل آیا اور مرکزی گیٹ کے سامنے پہنچ کر خود کو دھماکے سے اُڑا لیا۔ حملہ آور نے چادر اوڑھ رکھی تھی۔

دھماکے کے نتیجے میں گیٹ پر موجود تین اہلکار موقع پر ہی شہید ہوگئے، تاہم رپورٹ کے مطابق مرکزی گیٹ کو کوئی بڑا نقصان نہیں پہنچا۔

دھماکے کے فوراً بعد شلوار قمیض پہنے دو مزید دہشت گرد سائیڈ گیٹ سے احاطے میں داخل ہوئے۔ دونوں کے پاس رائفلز اور ہینڈ گرنیڈ موجود تھے۔

پولیس کے مطابق اندر داخل ہونے کے بعد دونوں حملہ آور موٹر سائیکل اسٹینڈ کی طرف بڑھے، فائرنگ کی اور جوابی کارروائی میں ہلاک کر دیے گئے۔ دہشت گردوں کو مرکزی گیٹ سے 30 سے 40 میٹر کے اندر ہی مار دیا گیا۔

رپورٹ میں مزید کہا گیا ہے کہ دہشت گردوں کا مقصد اہلکاروں کو یرغمال بنانا تھا، کیونکہ ہیڈکوارٹرز میں اعلیٰ افسران موجود تھے اور اس وقت پریڈ بھی جاری تھی۔ مقام کو مکمل طور پر کلیئر کر دیا گیا ہے۔