بالی ووڈ کے لیجنڈ دھرمیندر 89 برس کی عمر میں انتقال کر گئے

بالی ووڈ کے عظیم اداکار دھرمیندر 89 سال کی عمر میں انتقال کر گئے۔

بھارتی میڈیا کے مطابق دھرمیندر نے پیر کے روز ممبئی کے بریچ کینڈی اسپتال میں آخری سانس لی۔

 ان کے گھر کے باہر متعدد فلمی شخصیات اور اہلخانہ کو سفید لباس میں آتے دیکھا گیا۔

معروف فلم ساز کرن جوہر نے بھی انسٹاگرام پر ان کے انتقال کی تصدیق کی اور لیجنڈ اداکار کے لیے تعزیتی پیغام جاری کیا۔

رپورٹس کے مطابق دھرمیندر کو دو ہفتے قبل سانس لینے میں دشواری کے باعث اسپتال میں داخل کیا گیا تھا، جبکہ رواں سال اپریل میں ان کی آنکھ کی سرجری بھی ہوئی تھی۔

دھرمیندر نے آخری بار اپنی اداکاری فلم "اکیس" میں دکھائی جو 25 دسمبر کو ریلیز ہونے والی ہے۔

لیجنڈ اداکار کی زندگی پر ایک نظر

دھرمیندر نے 1960 میں فلم "دل بھی تیرا ہم بھی تیرے" سے فلمی سفر کا آغاز کیا اور 2012 میں بھارت کے تیسرے بڑے سول ایوارڈ پدم بھوشن سے نوازے گئے۔

چھ دہائیوں پر محیط شاندار کیریئر میں انہوں نے شعلے، یادوں کی بارات، میرا گاؤں میرا دیش، نوکر بیوی کا، پھول اور پَت، پھول اور پتلی سمیت بے شمار مقبول اور ایوارڈ یافتہ فلموں میں کام کیا۔

وہ لدھیانہ کے ایک گاؤں میں دھرمیندر کیول کرشن دیول کے نام سے پیدا ہوئے۔

 فلم انڈسٹری میں آنے سے پہلے انہوں نے 19 برس کی عمر میں پرکاش کور سے شادی کی۔ بعد ازاں وہ اداکارہ ہیما مالنی کے ساتھ رشتہ ازدواج میں منسلک ہوئے۔

89 برس کی عمر میں بھی دھرمیندر سوشل میڈیا پر فعال رہے اور اکثر صحت مند طرزِ زندگی کی ترغیب دینے والی ویڈیوز شیئر کرتے رہے۔ ان کی متعدد ویڈیوز میں وہ ٹریکٹر چلاتے، فارم کی دیکھ بھال کرتے اور مداحوں کو سادگی اور کھیتی باڑی کے مشورے دیتے نظر آتے تھے۔