اقوام متحدہ کا مقبوضہ کشمیر میں انسانی حقوق کی خلاف ورزیوں پر تشویش کا اظہار

اقوام متحدہ نے مقبوضہ کشمیر میں بھارت کی جانب سے انسانی حقوق کی سنگین خلاف ورزیوں پر گہری تشویش کا اظہار کیا ہے۔ انسانی حقوق کے ماہرین نے دوران حراست تشدد، مشکوک اموات اور بدسلوکی کے واقعات کی شدید مذمت کی۔

اقوام متحدہ کے مطابق پہلگام واقعے کے بعد بھارتی سکیورٹی فورسز اور حکام نے بین الاقوامی انسانی حقوق کی کھلم کھلا خلاف ورزی کی، اور انسانی حقوق کے کارکنوں، صحافیوں سمیت 2800 افراد کو غیر قانونی طور پر گرفتار کیا گیا۔

 دہشت گردی کے شبہ میں یا بغیر الزام کے مسلم خاندانوں کے گھروں کو نشانہ بنایا گیا، اور ذمہ داروں کو انصاف کے کٹہرے میں لانے کا مطالبہ کیا گیا ہے۔

اقوام متحدہ نے مقبوضہ وادی میں انسانی حقوق کی صورتحال کا آزادانہ اور شفاف جائزہ لینے کا مطالبہ کیا۔ رپورٹ میں دوران حراست تشدد، بدسلوکی، حراستی ہلاکتوں اور لنچنگ پر تشویش ظاہر کی گئی۔

 مبینہ اجتماعی سزا کے طور پر گھروں کی مسماری، جبری بے دخلی، موبائل انٹرنیٹ کی معطلی اور ہزاروں سوشل میڈیا اکاؤنٹس کے بلاک کرنے کو بنیادی حقوق کی سنگین خلاف ورزی قرار دیا گیا۔

رپورٹ میں کشمیری طلبہ کی نگرانی، ڈیٹا کلیکشن اور بھارت بھر میں مسلمانوں کے خلاف نفرت انگیز تقاریر میں اضافے پر سوال اٹھائے گئے، جبکہ گجرات و آسام میں مسلم گھروں، مساجد اور کاروبار کی مسماری اور جبری بے دخلیوں کو امتیازی اقدام قرار دیا گیا۔ 

اقوام متحدہ کے ماہرین نے کہا کہ مسلمانوں اور روہنگیا پناہ گزینوں کو خطرناک حالات میں جبری طور پر واپس بھیجا گیا، اور بھارت پر زور دیا کہ قوانین میں اصلاحات، شفاف تحقیقات، ذمہ داروں کے احتساب اور تمام من مانی حراستوں کا خاتمہ کرے۔