بیرک مائننگ نے ریکو ڈک منصوبے میں پاکستان کے ساتھ وابستگی کا اعادہ کر دیا

بیرک مائننگ کارپوریشن کے عبوری چیف ایگزیکٹو آفیسر نے کہا ہے کہ کمپنی پاکستان کے ریکو ڈک تانبے کی کان کے منصوبے میں اپنے عزم پر قائم ہے، جو دنیا کی سب سے بڑی غیر ترقی یافتہ تانبے کی ذخائر میں سے ایک ہے۔

بلوچستان کے مغربی اور دور دراز علاقے میں واقع 7 ارب ڈالر مالیت کے اس منصوبے میں پاکستانی حکام کے ساتھ مساوی شراکت داری ہے اور توقع کی جا رہی ہے کہ 2028 کے آخر تک پیداوار شروع ہو جائے گی۔

کمپنی کے سی ای او مارک ہل نے رائٹرز سے بات کرتے ہوئے کہا کہ بیرک ریکو ڈک منصوبے اور پاکستان کے ساتھ وابستگی برقرار رکھے ہوئے ہے۔

 منصوبے میں سکیورٹی اور ریلوے لائن کی اپ گریڈیشن اہم چیلنجز ہیں تاکہ تانبے کے کنسنٹریٹ کو کراچی منتقل کیا جا سکے۔

انٹرنیشنل فنانس کارپوریشن، ایشیائی ترقیاتی بینک سمیت دیگر قرض دہندگان 2 ارب 60 کروڑ ڈالر سے زائد کے مالی پیکج پر کام کر رہے ہیں۔

 توقع ہے کہ منصوبے کے پہلے مرحلے میں سالانہ 2 لاکھ ٹن تانبہ پیدا ہوگا اور 37 سال میں 70 ارب ڈالر سے زیادہ فری کیش فلو متوقع ہے۔

پاکستان اس منصوبے کو اپنی معدنی حکمت عملی کی بنیاد بنانا چاہتا ہے، جبکہ بیرک اسے اپنی طویل المدتی سرمایہ کاری میں اہم سمجھتی ہے۔