عالمی برادری کا انسانوں کی غیر قانونی تجارت روکنے کیلئے مشترکہ عزم

اقوام متحدہ کی جنرل اسمبلی نے انسانی سمگلنگ کی روک تھام کیلئے ایک اہم قرارداد منظور کرلی ہے۔ 

’’2025 پولیٹیکل ڈیکلریشن برائے نفاذِ گلوبل پلان آف ایکشن ٹو کمبیٹ ٹریفیکنگ ان پرسنز‘‘ کے عنوان سے منظور کی گئی اس قرارداد میں انسانی سمگلنگ کو سنگین جرم اور انسانی وقار پر حملہ قرار دیتے ہوئے سخت مذمت کی گئی ہے۔

193 ارکان کی جنرل اسمبلی نے اس بات کا اعادہ کیا کہ انسانی سمگلنگ کی بنیادی وجوہات کے خلاف کوششیں تیز کی جائیں گی، خاص طور پر خواتین اور بچوں کے تحفظ کے لیے مزید موثر اقدامات کیے جائیں گے۔

اقوام متحدہ میں پاکستان کے نائب مستقل مندوب عثمان جدون نے اپنے خطاب میں کہا کہ انسانی سمگلنگ دنیا بھر میں افراد اور معاشروں کو شدید متاثر کر رہی ہے، جبکہ مسلح تنازعات، ماحولیاتی تباہی اور معاشی عدم مساوات اس مسئلے کو مزید سنگین بنا رہے ہیں۔

انہوں نے بچوں کے بڑھتے ہوئے شکار بننے کے رجحان پر تشویش ظاہر کرتے ہوئے کہا کہ پاکستان ایک ایسا ملک ہے جو بیک وقت ہجرت کے حوالے سے روانگی، گزرگاہ اور میزبان تینوں کردار ادا کرتا ہے، اس لیے یہ مسئلہ پاکستان کے لیے خاص اہمیت رکھتا ہے۔

پاکستانی مندوب نے زور دیا کہ انسانی سمگلنگ کی بنیادی وجوہات کے خاتمے، معاشی ناہمواری کم کرنے، قانونی و محفوظ ہجرت کے راستے بڑھانے اور تنازعات کے حل کے اقدامات ناگزیر ہیں۔