لاہور ہائیکورٹ نے سلمان مرتضیٰ کی 3 سال قید معطل کر کے ضمانت منظور کر لی

لاہور ہائیکورٹ نے پیکا قانون کے تحت سزا یافتہ مجرم سلمان مرتضیٰ کی 3 سال قید کی سزا معطل کرتے ہوئے ایک لاکھ روپے کے مچلکوں پر اس کی ضمانت منظور کر دی۔

 جسٹس شہرام سرور چوہری اور جسٹس سردار علی اکبر ڈوگر پر مشتمل دو رکنی بینچ نے سزا معطلی کی درخواست پر سماعت کی، جس میں وکیل میاں داؤد ایڈووکیٹ پیش ہوئے۔

وکیل نے عدالت کو بتایا کہ ٹرائل کورٹ نے سلمان مرتضیٰ کو اپنی کزن کی قابل اعتراض تصاویر چوری اور شیئر کرنے کے الزام میں سزا دی تھی، حالانکہ متاثرہ لڑکی نے تسلیم کیا کہ کوئی مواد شیئر نہیں ہوا۔

 استغاثہ ایک بھی الزام ثابت نہ کر سکا، اور مقدمہ مجرم کو اس کے رشتہ داروں کی جانب سے والدہ کی جائیداد کے لیے جھوٹے الزامات میں گھسانے کے لیے بنایا گیا تھا۔

عدالت نے ریکارڈ اور دلائل سننے کے بعد 3 سال قید کی سزا معطل کر کے سلمان مرتضیٰ کو ایک لاکھ روپے کے مچلکوں پر رہا کرنے کا حکم دیا۔