پی ٹی آئی چیئرمین گوہر: عمران خان سے ملاقات کے عدالتی احکامات پر عمل نہیں ہو رہا، سیاسی حل ہی راستہ ہے

پاکستان تحریکِ انصاف (پی ٹی آئی) کے چیئرمین بیرسٹر گوہر نے کہا ہے کہ بانیٔ پی ٹی آئی عمران خان سے ملاقات کے لیے عدالتوں کے دیے گئے احکامات پر عمل درآمد نہیں ہو رہا، جو شدید تشویش کا باعث ہے۔

جیو نیوز سے گفتگو میں بیرسٹر گوہر نے بتایا کہ عمران خان نے مذاکرات کا مکمل اختیار محمود خان اچکزئی اور علامہ ناصر عباس کو دے دیا ہے۔ ان کا کہنا تھا کہ ملک کے سیاسی بحران کا حل صرف سیاسی مذاکرات کے ذریعے ہی ممکن ہے۔

پارلیمنٹ کے باہر میڈیا سے گفتگو میں بیرسٹر گوہر نے مزید کہا کہ انہیں عمران خان کی صحت سے متعلق سنجیدہ تحفظات ہیں، کیونکہ بانیٔ پی ٹی آئی سے آخری ملاقات 4 نومبر کو ہوئی تھی۔

دوسری جانب، اپوزیشن اتحاد کے سربراہ محمود خان اچکزئی نے کہا کہ ہمارا مؤقف واضح ہے کہ 25 کروڑ عوام کی منتخب پارلیمان ہی تمام فیصلے کرے۔

پی ٹی آئی رہنما اسد قیصر نے کہا کہ تمام سیاسی جماعتوں کو اپنی انا چھوڑ کر آگے بڑھنا ہوگا۔

گزشتہ شب عمران خان سے ملاقات کی اجازت نہ ملنے پر وزیراعلیٰ خیبر پختونخوا سہیل آفریدی نے راولپنڈی کے گورکھ پور ناکے پر دھرنا دیا جو اپوزیشن رہنماؤں سے مشاورت کے بعد ختم کیا گیا۔

مشاورت میں فیصلہ کیا گیا کہ منگل کو فیملی ملاقات کے روز دوبارہ اڈیالہ جیل جائیں گے اور کارکنوں کو بھی وہاں پہنچنے کی کال دی جائے گی۔