وزیراعلیٰ خیبر پختونخوا سہیل خان آفریدی کی چیف جسٹس اسلام آباد ہائی کورٹ سے ملاقات نہیں ہوسکی

وزیراعلیٰ خیبر پختونخوا سہیل خان آفریدی، بانی پی ٹی آئی کی بہن علیمہ خان اور وکلا چیف جسٹس اسلام آباد ہائی کورٹ سرفراز ڈوگر کے سیکریٹری کے دفتر سے روانہ ہوگئے، کیونکہ ملاقات ممکن نہیں ہوسکی۔

اس موقع پر وزیراعلیٰ سہیل خان آفریدی نے کہا کہ ہماری شنوائی نہیں ہوئی اور ہمیں چیف جسٹس کی جانب سے پیغام ملا کہ "میں آپ سے ملاقات نہیں کر سکتا۔" انہوں نے مزید کہا کہ ایسا کون سا راستہ بچا ہے جس کے ذریعے وہ اپنے لیڈر سے ملاقات کر سکیں۔

وزیراعلیٰ نے اعلان کیا کہ آج قومی اسمبلی اور سینیٹ کے اجلاس نہیں چلنے دیں گے اور آئندہ منگل کو ہائی کورٹ اور اڈیالہ جیل کے باہر بھی احتجاج کریں گے۔

ایڈووکیٹ جنرل خیبر پختونخوا نے غیر رسمی گفتگو میں بتایا کہ چیف جسٹس نے کسی سے ملاقات سے انکار کیا ہے اور نہ ہی انہوں نے ایڈووکیٹ جنرل یا کسی وکیل سے ملاقات کی ہے۔