اڈیالہ جیل کے اطراف سیکیورٹی ہائی الرٹ، 700 سے زائد اہلکار تعینات

امن و امان کی صورتحال کے پیشِ نظر اڈیالہ جیل کے گرد سیکیورٹی مزید سخت کر دی گئی ہے اور اس مقصد کے لیے خصوصی سیکیورٹی پلان نافذ کر دیا گیا ہے۔

 پولیس ذرائع کے مطابق جیل روڈ پر 5 اضافی پکٹس قائم کر دی گئی ہیں، جن میں داہگل ناکہ، گیٹ ون، گیٹ فائیو، فیکٹری ناکہ اور گورکھ پور شامل ہیں جہاں اضافی نفری تعینات رہے گی۔

پولیس کے مطابق افسران اور اہلکاروں کی ڈیوٹی دو الگ الگ 12 گھنٹے کی شفٹوں میں تقسیم کی گئی ہے، جبکہ 12 تھانوں کے ایس ایچ اوز اور خواتین پولیس اہلکار بھی فرائض سرانجام دیں گی۔ 

مجموعی طور پر 700 سے زائد اہلکار اور افسر بیرونی سیکیورٹی پر موجود ہوں گے، جو اینٹی رائٹ سامان سے لیس ہوں گے۔

ایس پی صدر انعم شیر سیکیورٹی امور کی براہ راست نگرانی کریں گی، جبکہ اڈیالہ گارڈز کی نفری کو اسٹینڈ بائی رکھا جائے گا۔