وسیم اکرم کا ریکارڈ مچل اسٹارک کے نشانے پر، لیفٹ آرم فاسٹ بولرز میں سب سے زیادہ ٹیسٹ وکٹیں ٹوٹنے کا امکان

پاکستان کے سابق کپتان اور سوئنگ کے سلطان وسیم اکرم کے 414 ٹیسٹ وکٹوں کا ریکارڈ آسٹریلوی فاسٹ بولر مچل اسٹارک کے لیے خطرے میں آ گیا ہے۔

وسیم اکرم نے 104 ٹیسٹ میچز میں 414 وکٹیں حاصل کر کے لیفٹ آرم فاسٹ بولرز میں سب سے زیادہ وکٹوں کا اعزاز اپنے نام کیا۔ 

مچل اسٹارک نے 2011 میں ٹیسٹ ڈیبیو کیا اور 101 میچز میں 412 کھلاڑیوں کو پویلین کی راہ دکھائی ہے۔

اسٹارک کو وسیم اکرم کا ریکارڈ توڑنے کے لیے صرف تین وکٹیں درکار ہیں اور امکان ہے کہ وہ یہ اعزاز 4 دسمبر سے شیڈول دوسرے ایشیز ٹیسٹ میں حاصل کر لیں گے۔

لیفٹ آرم فاسٹ بولرز کی ٹیسٹ کرکٹ میں سب سے زیادہ وکٹوں کی فہرست میں سری لنکا کے چمندا واس 355 وکٹوں کے ساتھ تیسرے، نیوزی لینڈ کے ٹرینٹ بولٹ 317 وکٹوں کے ساتھ چوتھے اور آسٹریلیا کے مچل جانسن 313 وکٹوں کے ساتھ پانچویں نمبر پر موجود ہیں۔

 اسٹارک کے علاوہ باقی تمام کھلاڑی بین الاقوامی کرکٹ سے ریٹائر ہو چکے ہیں۔