اسلام آباد ہائی کورٹ کی سالانہ کارکردگی رپورٹ جاری، 2025 میں 15 ہزار سے زائد مقدمات نمٹا دیے گئے

اسلام آباد ہائی کورٹ نے اپنی سالانہ کارکردگی رپورٹ جاری کر دی ہے، جس کے مطابق عدالت نے سال 2025 کے دوران مجموعی طور پر 15 ہزار 805 مقدمات کے فیصلے کیے۔

رپورٹ میں بتایا گیا ہے کہ سال بھر میں سنگل بینچز نے 11 ہزار 108 جبکہ لارجر اور ڈویژن بینچز نے 4 ہزار 697 کیسز نمٹائے۔

اعداد و شمار کے مطابق جسٹس انعام امین منہاس سب سے زیادہ 2 ہزار 93 مقدمات نمٹا کر فہرست میں سرفہرست رہے۔ ان کے بعد جسٹس محمد اعظم خان نے 1 ہزار 841 اور جسٹس محمد آصف نے 1 ہزار 338 کیسز کے فیصلے کیے۔

چیف جسٹس سردار محمد سرفراز ڈوگر نے مجموعی طور پر 1 ہزار 223 مقدمات نمٹائے، جن میں سے 13 فیصلے انہوں نے بطور قائم مقام چیف جسٹس کیے۔ جسٹس محسن اختر کیانی نے 1 ہزار 80 جبکہ جسٹس میاں گل حسن اورنگزیب نے 107 مقدمات کے فیصلے کیے۔

مزید بتایا گیا کہ جسٹس طارق محمود جہانگیری نے 706، جسٹس بابر ستار نے 387، جسٹس سردار اعجاز اسحاق خان نے 347 جبکہ جسٹس ارباب محمد طاہر نے 812 کیسز نمٹائے۔

سالانہ رپورٹ کے مطابق جسٹس ثمن رفعت امتیاز نے 685 اور جسٹس خادم حسین سومرو نے 529 مقدمات کے فیصلے کیے۔ چیف جسٹس، جسٹس ارباب محمد طاہر اور جسٹس اعظم خان پر مشتمل لارجر بینچ نے 32 کیسز نمٹائے۔

ڈویژن بینچز میں جسٹس بابر ستار اور جسٹس سردار اعجاز اسحاق خان پر مشتمل خصوصی بینچ نے سب سے زیادہ 412 ٹیکس کیسز نمٹائے، جو خصوصی طور پر ٹیکس معاملات کی سماعت کے لیے قائم کیا گیا تھا۔