بلوچستان کے ضلع پنجگور میں سیکیورٹی فورسز کا بھارتی حمایت یافتہ دہشتگردوں کے خلاف کامیاب آپریشن

سیکیورٹی فورسز نے بلوچستان کے ضلع پنجگور میں کارروائی کرتے ہوئے بھارتی حمایت یافتہ 4 دہشتگردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق یہ کارروائی دہشتگردوں کی موجودگی کے بارے میں خفیہ اطلاعات پر کی گئی۔

آپریشن کے دوران دہشتگردوں کے ٹھکانے کو مؤثر انداز میں نشانہ بنایا گیا اور شدید فائرنگ کے تبادلے میں 4 دہشتگرد ہلاک ہوئے۔

 ہلاک شدگان کے قبضے سے اسلحہ، گولہ بارود اور دھماکا خیز مواد بھی برآمد ہوا۔ آئی ایس پی آر نے بتایا کہ علاقے میں کسی بھی دہشتگرد کو ہلاک کرنے کے لیے کلیئرنس آپریشن جاری ہے۔

بیان میں مزید کہا گیا کہ سیکیورٹی فورسز ’عزمِ استحکام‘ کے تحت دہشتگردی کے خلاف کارروائیاں جاری رکھے ہوئے ہیں تاکہ اس ناسور کا مکمل خاتمہ ممکن بنایا جا سکے۔