پنجاب پروٹیکشن اونرشپ ایکٹ پر لاہور ہائیکورٹ کے ریمارکس، معاملے کو سیاسی نہ بنانے کی ہدایت

لاہور ہائیکورٹ کے جسٹس فیصل زمان خان نے پنجاب پروٹیکشن اونرشپ ایکٹ 2025 کے خلاف دائر آئینی درخواست پر سماعت کے دوران ریمارکس دیے ہیں کہ کیا اس معاملے کو سیاسی بنانا ضروری ہے۔

عدالت میں دائر درخواست کی سماعت کے دوران جسٹس فیصل زمان خان نے درخواست کو عدالتی چھٹیوں کے بعد متعلقہ بینچ کے سامنے مقرر کرنے کی ہدایت کر دی۔

سماعت کے دوران عدالت نے وکیل اظہر صدیق سے استفسار کیا کہ شدید ٹرولنگ کے باوجود عدالت نے اس معاملے کو اٹھایا، تاہم کیا اس ایشو کو سیاسی رنگ دینا ضروری تھا؟

جسٹس فیصل زمان خان نے کہا کہ درخواست دو پی ٹی آئی کے ایم پی ایز کے ذریعے دائر کی گئی، مگر کیا ان اراکینِ اسمبلی نے اس ایکٹ کے خلاف اسمبلی میں کوئی بات کی؟ عدالت نے ریمارکس دیے کہ یہ اراکین اسمبلی میں خاموش رہے اور براہِ راست عدالت سے رجوع کر لیا۔

عدالت نے مزید کہا کہ درخواست کو سوشل میڈیا پر بھی شیئر کیا گیا، جبکہ اس معاملے کو سیاست سے پاک رکھا جانا چاہیے کیونکہ یہ غریب شہریوں کی جائیدادوں سے متعلق ہے۔

جسٹس فیصل زمان خان نے وکیل سے کہا کہ اس نوعیت کی درخواست کے ذریعے حکومت کو فائدہ پہنچ رہا ہے اور بہتر ہوتا کہ کسی متاثرہ فریق کی جانب سے درخواست دائر کی جاتی۔ عدالت نے درخواست واپس لینے کا مشورہ دیتے ہوئے افسوس کا اظہار بھی کیا۔

درخواست گزار کا مؤقف ہے کہ جائیداد سے متعلق اختیارات انتظامیہ کو دے کر آئین کی خلاف ورزی کی گئی، جبکہ ڈسپیوٹ ریزولوشن کمیٹی میں فریقین کو وکیل کے ذریعے پیش ہونے کی اجازت نہیں دی گئی۔

پی ٹی آئی اراکین نے درخواست میں مؤقف اپنایا کہ سول عدالتوں کا دائرہ اختیار ختم کرنا آئین کے منافی ہے اور انتظامی و عدالتی اختیارات کو یکجا کرنا عدلیہ کی آزادی پر حملہ ہے، جس پر ایکٹ اور اس کے تحت کیے گئے اقدامات کو کالعدم قرار دینے کی استدعا کی گئی ہے۔