سپیکر پنجاب اسمبلی نے خیبرپختونخوا کے وزیراعلیٰ کی آمد کے دوران پی ٹی آئی کے رویے کی مذمت کر دی

لاہور: سپیکر پنجاب اسمبلی ملک محمد احمد خان نے خیبرپختونخوا کے وزیراعلیٰ کی آمد کے دوران پی ٹی آئی کے کارکنوں کے رویے کی شدید مذمت کی۔

پریس کانفرنس کے دوران انہوں نے کہا کہ خیبرپختونخوا سے آئے افراد نے نامناسب رویہ اختیار کیا اور ایسے افراد کو اسمبلی میں لایا گیا جو جگہ جگہ مقدمات میں نامزد یا سزا یافتہ ہیں۔

 سپیکر نے واضح کیا کہ کسی کو پراپرٹی کو نقصان پہنچانے یا کارروائی میں خلل ڈالنے کا حق نہیں ہے، اور اسمبلی کی کارروائی قوانین اور سکیورٹی پروٹوکول کے تحت چلائی جاتی ہے۔

انہوں نے مزید کہا کہ پی ٹی آئی مقدس مقامات کا احترام نہیں کرتی، اور اس واقعے کے دوران وزیراعلیٰ مریم نواز کے خلاف نامناسب زبان استعمال کی گئی۔ 

اس معاملے کی جانچ کے لیے ایک ہائی پاور انکوائری کمیٹی مقرر کی گئی ہے، جبکہ اسمبلی کے ہر کونے کی CCTV نگرانی کی جاتی ہے۔

ملک محمد احمد خان نے کہا کہ افواج پاکستان ملک کا فخر ہیں اور کسی کو یہ حق نہیں کہ انہیں کمزور کرے۔

 انہوں نے پی ٹی آئی پر تنقید کی کہ انہوں نے متعدد فوجی تنصیبات اور سیاسی دفاتر پر منظم حملے کیے، اور یہ کوئی عوامی ردعمل نہیں بلکہ پیشگی منصوبہ بندی تھی۔