گھانا: جھوٹا نبی اور طوفان کشتی کا معاملہ، کشتی کو آگ لگانے اور نیا وعدہ

افریقی ملک گھانا میں خود کو نبی کہنے والے شخص "ایبو نوح" کے مبینہ طوفان اور نجات کی کشتیوں کے منصوبے نے نیا رخ اختیار کر لیا ہے۔

مقامی میڈیا کے مطابق ایبو نوح نے دعویٰ کیا تھا کہ 25 دسمبر 2025 کو دنیا میں بڑا طوفان آئے گا اور صرف اس کی تیار کردہ کشتیوں میں موجود افراد محفوظ رہیں گے۔

 اس دعوے پر یقین کرتے ہوئے کئی افراد نے اپنی جائیدادیں فروخت کر کے کشتیوں میں جگہ حاصل کی۔

تاہم حالیہ واقعے میں نامعلوم افراد نے ایک کشتی کو آگ لگا دی، جسے اس منصوبے کی علامت سمجھا جا رہا تھا۔ بعد میں معلوم ہوا کہ جلنے والی کشتی کسی اور کی تھی، اور واقعے کو محض ایک علامتی پیغام قرار دیا جا رہا ہے۔

سوشل میڈیا پر وائرل ویڈیو میں ایبو نوح کو نئی مرسڈیز گاڑی میں دیکھا گیا، جس کی قیمت تقریباً 89 ہزار ڈالر بتائی گئی۔ مبینہ طور پر یہ گاڑی اس کے پیروکاروں سے جمع کی گئی رقم سے خریدی گئی، جس پر عوامی ردعمل شدید ہوا۔

گھانا کی سکیورٹی فورسز نے ایبو نوح کو جھوٹی معلومات پھیلانے اور عوام کو گمراہ کرنے کے الزام میں گرفتار کر لیا ہے، اور اس کے خلاف قانونی کارروائی جاری ہے۔

بعد ازاں ایبو نوح نے ایک نئی ویڈیو میں دنیا کے خاتمے کی تاریخ مؤخر کرنے کا اعلان کیا اور دعویٰ کیا کہ اسے مزید وقت دیا گیا ہے تاکہ وہ زیادہ لوگوں کو "نجات" فراہم کر سکے، ساتھ ہی نئی کشتیوں کی تیاری کا بھی وعدہ کیا، جس پر سوشل میڈیا پر شدید تنقید جاری ہے۔