عماد وسیم کی اہلیہ ثانیہ اشفاق کے حیران کن انکشافات، بچوں کی پرورش اور ازدواجی زندگی پر شدید خدشات

سابق قومی کرکٹر عماد وسیم کی جانب سے طلاق کے اعلان کے بعد ان کی اہلیہ ثانیہ اشفاق نے سوشل میڈیا پر حیران کن انکشافات کیے ہیں۔

ثانیہ اشفاق نے کہا کہ ان کا گھر اجاڑ دیا گیا اور بچے اپنے والد سے محروم ہوگئے، جبکہ پانچ ماہ کے بچے کو ابھی تک والد نے نہیں تھاما۔

ثانیہ کے مطابق شادی کے دوران مشکلات ضرور رہیں، مگر تعلق برقرار رہا اور انہوں نے بطور بیوی اور ماں ہر ممکن کوشش کی۔

 ان کا کہنا تھا کہ مسائل اس وقت پیدا ہوئے جب ایک تیسری شخصیت ان کی ازدواجی زندگی میں داخل ہوئی، جو عماد وسیم سے شادی کی خواہشمند تھی۔

 انہوں نے بچوں کے مستقبل اور گھر کے وقار کے لیے ذہنی اذیت اور تلخ رویہ برداشت کیا۔

انہوں نے مزید کہا کہ جو لوگ انہیں خاموش رہنے کا مشورہ دے رہے ہیں، انہیں معلوم ہونا چاہیے کہ انصاف ضرور ہوگا اور تمام متعلقہ باتوں کے دستاویزی ثبوت موجود ہیں۔

ثانیہ نے واضح کیا کہ دھمکیوں سے دستاویزات کو منظرعام پر لانے سے روکنے کی کوشش کی جا رہی ہے، لیکن وہ قانونی طور پر اس کا جواب دیں گی۔

 انہوں نے کہا کہ وہ بدلے کے لیے نہیں بلکہ اپنے اور بچوں کے حق میں سچ بول رہی ہیں اور ہر اس خاتون کی آواز بننا چاہتی ہیں جسے خاموش کر دیا جاتا ہے۔

واضح رہے کہ سابق آل راؤنڈر عماد وسیم نے اپنے طویل عرصے سے جاری اختلافات کے بعد طلاق دینے کا اعلان کیا تھا۔

 انہوں نے کہا کہ طویل سوچ وبچار اور گزشتہ چند برسوں سے حل نہ ہونے والے اختلافات کے بعد انہوں نے طلاق کے لیے قانونی کارروائی شروع کی۔

عماد وسیم اور ثانیہ اشفاق کی شادی 2019 میں ہوئی تھی اور ان کے تین بچے ہیں۔