کرسٹیانو رونالڈو مسلسل تیسری بار مشرقِ وسطیٰ کے بہترین فٹبالر قرار پائے

پرتگال کے عالمی شہرت یافتہ فٹبال اسٹار کرسٹیانو رونالڈو نے مسلسل تیسری مرتبہ مشرقِ وسطیٰ بہترین فٹبالر آف دی ایئر کا اعزاز حاصل کر لیا۔

رونالڈو کو یہ ایوارڈ دبئی میں منعقد ہونے والی گلوب سوکر ایوارڈز کی تقریب میں دیا گیا، جہاں انہوں نے کریم بنزیما، سالم الدوسری اور ریاض محرز جیسے نمایاں کھلاڑیوں کو پیچھے چھوڑا۔

سال 2025 میں رونالڈو نے تمام مقابلوں میں مجموعی طور پر 40 گول اسکور کیے، جو ان کی شاندار فارم اور مستقل کارکردگی کا ثبوت ہے۔

وہ اس وقت سعودی عرب کے معروف کلب النصر کی نمائندگی کر رہے ہیں، اور ان کا معاہدہ 2027 کے وسط تک جاری رہے گا۔

ایوارڈ وصول کرتے ہوئے 40 سالہ اسٹار فٹبالر نے جذباتی تقریر میں کہا کہ مزید کھیلنا مشکل ہے مگر میرا جذبہ بلند ہے اور میں کھیلنے کے لیے تیار ہوں۔

رونالڈو نے کہا کہ چاہے وہ مڈل ایسٹ میں کھیلیں یا یورپ میں، انہیں فٹبال کھیلنا، گولز کرنا اور ٹرافیز جیتنا پسند ہے۔

انہوں نے مزید کہا، "میرا مقصد مزید ٹرافیز جیتنا اور ایک ہزار گول اسکور کرنا ہے۔ اگر انجری نہ ہوئی تو انشاءاللہ میں یہ ہدف حاصل کروں گا۔"