ابھرتی اداکارہ ریحام رفیق نے ڈپریشن سے لڑائی کا انکشاف کر دیا

پاکستانی شوبز انڈسٹری کی ابھرتی اداکارہ ریحام رفیق نے ڈپریشن کا سامنا کرنے کا انکشاف کیا ہے۔

 کچھ عرصے سے ذہنی دباؤ کی وجہ سے سوشل میڈیا سے دور رہنے والی اداکارہ نے حال ہی میں انسٹاگرام پر ایک مختصر ویڈیو شیئر کی، جس میں انہیں اپنے ذہنی دباؤ سے نبردآزما ہوتے دیکھا جا سکتا ہے۔

ریحام نے مداحوں اور عوام سے اپیل کی کہ جو کوئی بھی اپنی ذہنی مشکلات کے بارے میں بات کرے، اس کے ساتھ نرمی، سنجیدگی اور مناسب تعاون کے ساتھ پیش آئیں۔

ویڈیو کے کیپشن میں انہوں نے لکھا: "ذہنی صحت کوئی ڈرامہ نہیں بلکہ دردناک ہے، اور کبھی کبھی بس زندہ رہنا ہی سب سے مشکل کام لگتا ہے۔

 میں ہمیشہ ذہنی صحت کے لیے آواز بلند کروں گی، چاہے لوگ میرا مذاق اُڑائیں۔ میں شکر گزار ہوں کہ آپ میرے ساتھ ہیں۔"

مداحوں نے ان کی صحت یابی اور حوصلے کے لیے دعائیں کیں، جس پر ریحام نے نیک خواہشات کے اظہار کرنے والے تمام فالوورز کا شکریہ ادا کیا۔