سٹی کورٹ کراچی میں یوٹیوبر رجب بٹ پر تشدد، ضمانت کی سماعت 13 جنوری تک ملتوی

سٹی کورٹ کراچی میں پیشی کے دوران یوٹیوبر رجب بٹ پر تشدد کا واقعہ پیش آیا۔ رجب بٹ اپنی ضمانت کی درخواست کی سماعت کے لیے عدالت پہنچے تھے کہ اسی دوران بعض وکلاء نے ان پر حملہ کر دیا۔

ذرائع کے مطابق وکلاء رہنماؤں کا کہنا ہے کہ رجب بٹ نے عبوری ضمانت حاصل کرنے کے بعد ایک وی لاگ جاری کیا تھا، جس میں مدعی مقدمہ کے بارے میں نامناسب الفاظ استعمال کیے گئے، جس پر وکلاء برادری کی جانب سے شدید ردعمل سامنے آیا۔

واقعے کے بعد وکلاء کی ہڑتال کے باعث عدالت نے رجب بٹ کی ضمانت کی درخواست پر بغیر کسی کارروائی کے سماعت 13 جنوری تک ملتوی کر دی۔

عدالت نے رجب بٹ کی عبوری ضمانت میں بھی 13 جنوری تک توسیع کر دی ہے، جبکہ واقعے سے متعلق مزید قانونی کارروائی متوقع ہے۔