اسرائیل کا یو این ایجنسی برائے فلسطینی پناہ گزین (انروا) کا سفارتی استثنیٰ ختم کرنے کا فیصلہ

اسرائیل نے اقوام متحدہ کی فلسطینی پناہ گزینوں سے متعلق ایجنسی (انروا) کا سفارتی استثنیٰ ختم کر دیا ہے۔

 خبر ایجنسی کے مطابق اسرائیلی پارلیمنٹ نے اس حوالے سے قانون سازی کی منظوری دے دی ہے، جس کے بعد اسرائیلی عدالتوں میں انروا کے خلاف قانونی کارروائی ممکن ہو جائے گی۔

قانون کے تحت اسرائیلی حکام کو مقبوضہ بیت المقدس میں انروا کے دو دفاتر ضبط کرنے کا اختیار بھی حاصل ہوگا۔

 مزید برآں، یہ قانون اسرائیلی کمپنیوں کو انروا کے اداروں کو پانی، بجلی اور مالی خدمات فراہم کرنے سے روکتا ہے۔

خبر ایجنسی کے مطابق اسرائیل نے گزشتہ سال ہی انروا پر پابندی عائد کر دی تھی۔

 دوسری جانب انروا نے اس اقدام کو ایجنسی کو بدنام کرنے کی کوشش قرار دیتے ہوئے کہا ہے کہ وہ مشرقِ وسطیٰ بھر میں لاکھوں فلسطینی پناہ گزینوں کو تعلیم اور صحت کی بنیادی سہولیات فراہم کر رہی ہے۔