کراچی میں کھلے مین ہولز اور نالوں میں گرنے سے 2025 میں 27 افراد جاں بحق

کراچی: سال 2025 میں کراچی میں کھلے مین ہولز اور نالوں میں گرنے کے واقعات میں جاں بحق ہونے والوں کی تعداد 27 ہو گئی ہے۔

 یہ اعداد و شمار دسمبر 2025 تک جمع کیے گئے ہیں، جن میں بچوں اور بڑوں دونوں کے حادثات شامل ہیں۔

رواں سال 11 افراد کھلے مین ہولز میں اور 16 افراد نالوں میں گر کر جاں بحق ہوئے۔

 جنوری میں شاہ فیصل کالونی میں 6 سالہ عباد، فروری میں کشمیر کالونی 3 نمبر میں 5 سالہ طیب، اور 22 فروری کو سرجانی خدا کی بستی میں 3 سالہ اسد اللہ مین ہول میں جاں بحق ہوئے۔

اس کے علاوہ مارچ اور اپریل میں مختلف علاقوں میں افراد، بشمول 3 سالہ عبدالرحمٰن، 45 سالہ نامعلوم، 15 سالہ رجب، 10 سالہ سویرا اور 30 سالہ الطاف وغیرہ، کھلے مین ہولز اور نالوں میں گر کر جاں بحق ہوئے۔

اگست اور ستمبر میں ماڑی پور روڈ، گرومندر، لانڈھی اور لیاری میں مزید 5 افراد، بشمول 7 سالہ اسما، کھلے مین ہولز میں گر کر ہلاک ہوئے۔

 اس کے علاوہ 21 ستمبر کو گارڈن گھاس منڈی کے قریب تین افراد اور اکتوبر، نومبر میں دیگر افراد بھی اسی نوعیت کے حادثات میں جان سے ہاتھ دھو بیٹھے۔

کراچی کے شہریوں اور ماہرین کے مطابق، کھلے مین ہولز اور ناقص نالوں کی حفاظت نہ ہونا عوامی جانوں کے لیے سنگین خطرہ ہے، اور متعلقہ حکام سے فوری اقدامات کی ضرورت ہے۔