سعودی ردعمل کے بعد یو اے ای کا یمن میں باقی ماندہ انسدادِ دہشت گردی سرگرمیاں ختم کرنے کا اعلان

سعودی عرب کے سخت ردعمل کے بعد متحدہ عرب امارات نے یمن میں جاری اپنی باقی ماندہ انسدادِ دہشت گردی سرگرمیوں کے خاتمے کا اعلان کر دیا ہے۔

عالمی خبر رساں ادارے کے مطابق یو اے ای کی وزارتِ دفاع نے جاری بیان میں کہا ہے کہ انسدادِ دہشت گردی سے وابستہ محدود یونٹس کو رضاکارانہ طور پر واپس بلایا جائے گا، اور یہ عمل شراکت دار ممالک کے ساتھ مکمل رابطے اور ہم آہنگی سے انجام دیا جائے گا۔

وزارتِ دفاع کے مطابق اس فیصلے کا بنیادی مقصد یمن میں تعینات اہلکاروں کی حفاظت اور سلامتی کو یقینی بنانا ہے، جبکہ یہ فیصلہ حالیہ سکیورٹی صورتحال اور زمینی حقائق کے تفصیلی جائزے کے بعد کیا گیا ہے۔

بیان میں واضح کیا گیا کہ متحدہ عرب امارات نے اپنی براہِ راست فوجی موجودگی 2019 میں ہی ختم کر دی تھی، تاہم بعد ازاں صرف مخصوص اور محدود ٹیمیں انسدادِ دہشت گردی کے لیے موجود تھیں، جنہیں اب واپس بلایا جا رہا ہے۔

اماراتی وزارتِ دفاع نے کہا کہ یہ اقدام خطے میں امن، استحکام اور سلامتی کے فروغ کے لیے یو اے ای کے مستقل عزم کے مطابق ہے۔ بیان میں اس بات کا بھی اعادہ کیا گیا کہ یو اے ای 2015 سے عرب اتحاد کے تحت یمن کی بین الاقوامی طور پر تسلیم شدہ حکومت کی حمایت کرتا آ رہا ہے۔

واضح رہے کہ یہ اعلان ایسے وقت میں سامنے آیا ہے جب سعودی عرب نے یمن کی ایک بندرگاہ پر مبینہ اسلحہ بردار گاڑیوں کو نشانہ بنایا تھا اور یو اے ای پر جنوبی یمن کے علیحدگی پسند عناصر کو اسلحہ و مالی معاونت فراہم کرنے کا الزام عائد کیا تھا، جسے امارات نے مسترد کرتے ہوئے مایوس کن قرار دیا تھا۔

اس سے قبل یمن کی قانونی حکومت نے بھی یو اے ای سے 24 گھنٹوں میں یمن چھوڑنے کا مطالبہ کیا تھا۔