کراچی: ماڈل کالونی میں پولیس مقابلے میں بدنامِ زمانہ اسٹریٹ کرمنل ہلاک

کراچی کے علاقے ماڈل کالونی میں پولیس مقابلے کے دوران ایک بدنامِ زمانہ اسٹریٹ کرمنل رضوان ہلاک ہو گیا۔

ایس ایس پی کورنگی فدا حسین جانوری کے مطابق ہلاک ملزم چند ماہ قبل لانڈھی میں ڈکیتی کی مزاحمت کے دوران 12 سالہ بچے کے قتل اور اس کی والدہ کو زخمی کرنے میں ملوث تھا۔

 پولیس مقابلے میں ملزم کا ساتھی فرار ہونے میں کامیاب ہو گیا ہے اور اس کی تلاش جاری ہے۔ ہلاک ملزم کو مقتول بچے کی والدہ نے بھی شناخت کر لیا ہے۔

ایس ایس پی کورنگی نے بتایا کہ رضوان متعدد اسٹریٹ کرائم کی وارداتوں میں ملوث تھا اور مختلف تھانوں میں اس کے خلاف کئی مقدمات درج تھے۔

 پولیس کے مطابق دورانِ ڈکیتی ملزم نے متعدد افراد پر فائرنگ بھی کی، جبکہ اس کی وارداتوں کی سی سی ٹی وی فوٹیجز بھی موجود ہیں۔