ڈرامہ ’معمہ‘ میں صبا قمر کے بولڈ لک پر سوشل میڈیا پر شدید ردِعمل

پاکستان کی معروف اور فیشن آئیکون اداکارہ صبا قمر کو مشکل اور سنجیدہ کرداروں کو مؤثر انداز میں نبھانے پر ہمیشہ سراہا جاتا ہے۔

 انہوں نے پانی جیسا پیار، باغی، بےشرم، چیخ، ڈائجسٹ رائٹر، سنگت، فراڈ، سرِ راہ اور تمہارے حسن کے نام سمیت کئی مقبول ڈراموں میں اپنی اداکاری کے جوہر دکھائے ہیں۔

ان دنوں صبا قمر ڈراموں کیس نمبر 9 اور پامال میں مضبوط پرفارمنس کے باعث خبروں میں ہیں، جبکہ ان کے نئے ڈرامے معمہ میں ادا کردہ کردار نے بھی خاصی توجہ حاصل کی ہے۔

تاہم ڈرامہ معمہ میں صبا قمر کے انتہائی بولڈ لباس کے انتخاب پر سوشل میڈیا پر ملا جلا مگر خاصا سخت ردِعمل سامنے آیا ہے۔

 اس کے ساتھ ساتھ ان کا ایک بولڈ فوٹو شوٹ بھی وائرل ہو رہا ہے، جس میں وہ جدید طرز کا فِٹڈ گاؤن پہنے نظر آ رہی ہیں۔

سوشل میڈیا صارفین نے اس اندازِ لباس پر مختلف آراء کا اظہار کیا ہے۔ کچھ افراد نے اسے پاکستانی ڈراموں کے خاندانی مزاج کے منافی قرار دیا، جبکہ بعض نے نشریاتی اداروں اور ریگولیٹری اتھارٹی کے کردار پر بھی سوالات اٹھائے۔

کئی صارفین کا کہنا ہے کہ اداکاروں کو ٹی وی اسکرین پر لباس کے انتخاب میں وقار اور سماجی حدود کا خیال رکھنا چاہیے، جبکہ کچھ نے ذاتی زندگی اور آن اسکرین پیشکش کے درمیان فرق کو بھی اجاگر کیا۔