بی جے پی رہنما سنگیت سوم کا شاہ رخ خان پر سنگین الزام، ’غدار‘ قرار دے دیا

بھارتیہ جنتا پارٹی کے متنازع اور انتہا پسند رہنما سنگیت سوم نے بالی ووڈ کے سپر اسٹار شاہ رخ خان کے خلاف سخت اور اشتعال انگیز زبان استعمال کرتے ہوئے انہیں غدار قرار دے دیا ہے۔

یہ تنازع اس وقت سامنے آیا جب شاہ رخ خان کی ملکیت آئی پی ایل ٹیم کولکتہ نائٹ رائیڈرز نے بنگلادیش کے فاسٹ بولر مستفیض الرحمٰن کو اپنی ٹیم میں شامل کیا۔

 اُتر پردیش اسمبلی کے سابق رکن سنگیت سوم نے میرٹھ میں ایک عوامی اجتماع سے خطاب کے دوران کہا کہ بنگلادیشی کھلاڑی کو خریدنا ملک کے مفادات کے خلاف ہے۔

ان کا کہنا تھا کہ ایک جانب بنگلادیش میں ہندوؤں پر مبینہ تشدد کی خبریں آ رہی ہیں جبکہ دوسری جانب بھارتی کرکٹ لیگ میں وہاں کے کھلاڑیوں کو کروڑوں روپے دے کر شامل کیا جا رہا ہے، جو ناقابلِ قبول ہے۔

 انہوں نے الزام لگایا کہ شاہ رخ خان نے آئی پی ایل 2026 کی نیلامی میں مستفیض الرحمٰن کو تقریباً 9 کروڑ روپے میں خریدا۔

سنگیت سوم نے مزید کہا کہ شاہ رخ خان نے جو شہرت اور دولت حاصل کی ہے وہ بھارت کی بدولت ہے، اس کے باوجود وہ ایسے فیصلے کر رہے ہیں جو ان کے بقول ملک کے جذبات کے منافی ہیں۔

 انہوں نے یہاں تک دعویٰ کیا کہ اگر مستفیض الرحمٰن بھارت آئے تو وہ ایئرپورٹ سے باہر نہیں نکل سکیں گے۔

ان بیانات کے بعد سوشل میڈیا اور سیاسی حلقوں میں شدید ردعمل سامنے آیا ہے، جہاں اس معاملے کو کھیل، سیاست اور انتہاپسندی کے تناظر میں دیکھا جا رہا ہے۔