چیف جسٹس پاکستان نے 2026 کے لیے عدلیہ میں اصلاحات اور عوامی انصاف کی فراہمی پر زور دیا

چیف جسٹس آف پاکستان، جسٹس یحییٰ آفریدی نے کہا ہے کہ عدلیہ سال 2026 میں عوام کو بہتر اور مؤثر انصاف فراہم کرنے کے لیے بامقصد اصلاحات پر عمل کرے گی۔

 ان اصلاحات کا مقصد عدالتی نظام تک رسائی کو آسان بنانا، مقدمات میں تاخیر کم کرنا اور شفافیت کو مضبوط کرنا ہے۔

اپنے نئے سال کے پیغام میں چیف جسٹس نے کہا کہ آئندہ سال عدلیہ ٹیکنالوجی کو ذمہ داری کے ساتھ انصاف کی خدمت میں استعمال کرے گی۔

 ان کوششوں کا مقصد عوام کے لیے بروقت فیصلے، قابل فہم عدالتی طریقۂ کار اور عوام دوست نظام فراہم کرنا ہے۔

چیف جسٹس نے مزید کہا کہ انصاف نہ صرف ہو بلکہ دکھائی بھی دے، اور یہ بلا تاخیر، غیرجانبدارانہ اور منصفانہ ہونا چاہیے۔ 

عدلیہ کی اصلاحات میں خواتین، بچوں، محروم طبقات اور دور دراز علاقوں میں رہنے والے افراد کی ضروریات کو بھی مدنظر رکھا جائے گا۔

انہوں نے اس بات پر زور دیا کہ عدلیہ کا عزم عوامی اعتماد کو مضبوط کرنا اور آئین میں درج اقدار کی پاسداری جاری رکھنا ہے تاکہ ہر شہری تک انصاف پہنچ سکے۔