وزیراعلیٰ پنجاب مریم نواز نے واہگہ بارڈر پر نئے ایرینا کا افتتاح کر دیا

وزیراعلیٰ پنجاب مریم نواز شریف نے لاہور کے واہگہ بارڈر پر نئے تعمیر شدہ ایرینا کا افتتاح کر دیا۔ افتتاحی تقریب میں سینئر صوبائی وزیر مریم اورنگزیب، کور کمانڈر لاہور، وزراء اور سینئر بیورکریسی نے بھی شرکت کی۔

پاکستان رینجرز (پنجاب) کے زیر اہتمام جوائنٹ چیک پوسٹ واہگہ میں تعمیر کیے گئے نئے ایرینا کی خصوصی تقریب منعقد کی گئی، جس میں شائقین کی نشستوں کی گنجائش ساڑھے 7 ہزار سے بڑھا کر 25 ہزار کر دی گئی ہے۔

ایرینا کی توسیع کے ساتھ ساتھ جوائنٹ چیک پوسٹ پر نئی تعمیرات بھی کی گئی ہیں، جن میں تقسیم ہند کی عکاسی کرنے کے لیے ریلوے اسٹیشن کا ماڈل، یادگارِ شہداء، سامانِ حرب اور تھیم پارک شامل ہیں۔

اس کے علاوہ ایرینا میں پاکستان میوزیم، اضافی دفاتر، پنجاب رینجرز کے جوانوں کے لیے بیرکس، نمازیوں کے لیے پریئر ایریا اور فوڈ کورٹس بھی قائم کیے گئے ہیں۔ وسیع کار پارکنگ اور بابِ آزادی کے مقام پر شاہی قلعہ طرز کا عالمگیری دروازہ نصب کیا گیا ہے۔

واہگہ بارڈر پر قومی پرچم کی اونچائی بھی بڑھا دی گئی ہے، جو اب 139 میٹر بلند ہے اور یہ ایشیا کا ساتواں اور جنوبی ایشیا کا بلند ترین پرچم بن گیا ہے۔