شدید دھند کا راج، حدِ نگاہ کم ہونے پر متعدد موٹرویز بند

ملک کے مختلف علاقوں میں شدید دھند کے باعث حدِ نگاہ بری طرح متاثر ہو گئی ہے، جس کے پیش نظر موٹرویز کو مختلف مقامات سے بند کر دیا گیا ہے۔

ترجمان موٹروے پولیس کے مطابق موٹروے ایم ون پشاور سے رشکئی، ایم ٹو لاہور سے بالکسر اور ایم تھری لاہور سے ملتان تک ٹریفک کے لیے بند ہے۔

 اسی طرح موٹروے ایم فور پنڈی بھٹیاں سے ملتان، ایم فائیو ملتان سے سکھر اور ایم الیون لاہور سے سیالکوٹ تک بند کر دی گئی ہے۔

دوسری جانب قومی شاہراہوں پر بہاولپور، احمد پور شرقیہ، ترنڈہ محمد پناہ، اقبال آباد، رحیم یار خان، داؤدخیل اور صادق آباد کے علاقوں میں بھی شدید دھند چھائی ہوئی ہے، جہاں حدِ نگاہ 0 سے 100 میٹر تک ریکارڈ کی گئی ہے۔

ترجمان موٹروے پولیس سید عمران احمد کا کہنا ہے کہ موٹرویز کی بندش کا مقصد شہریوں کی جان و مال کا تحفظ ہے۔ 

انہوں نے کہا کہ دھند میں لین کی خلاف ورزی خطرناک حادثات کا سبب بن سکتی ہے، لہٰذا شہری لین ڈسپلن پر سختی سے عمل کریں اور دن کے اوقات میں سفر کو ترجیح دیں۔

 ان کے مطابق دھند میں صبح 10 بجے سے شام 6 بجے تک سفر نسبتاً محفوظ ہوتا ہے۔

انہوں نے مزید ہدایت کی کہ ڈرائیور حضرات فوگ لائٹس کا استعمال یقینی بنائیں، غیر ضروری سفر سے گریز کریں، تیز رفتاری سے بچیں اور آگے چلنے والی گاڑی سے مناسب فاصلہ رکھیں۔

 کسی بھی رہنمائی یا مدد کے لیے موٹروے پولیس کی ہیلپ لائن 130 پر رابطہ کیا جا سکتا ہے۔