افغانستان: طالبان حکام پر امدادی رقوم ہڑپ کرنے کے الزامات، عوام بھوک و افلاس کا شکار

افغانستان میں طالبان حکومت پر بین الاقوامی امدادی رقوم اور سامان میں بدعنوانی کے نئے الزامات سامنے آئے ہیں۔

 افغان میڈیا رپورٹس کے مطابق طالبان حکام نے ضرورت مند عوام کے لیے آنے والی امداد کا بڑا حصہ اپنے قبضے میں لے لیا، جس کے نتیجے میں عام شہری بھوک اور افلاس کا شکار ہیں۔

ہشت صبح کی رپورٹ کے مطابق صوبہ کندز میں طالبان حکام نے مستحق افراد کے لیے مختص امدادی سامان کا تقریباً نصف حصہ رکھ لیا۔

 یہ پیکجز سعودی کنگ سلمان ہیومینی ٹیرین ایڈ اینڈ ریلیف سینٹر کی جانب سے فراہم کیے گئے تھے۔

رپورٹس میں کہا گیا ہے کہ امدادی سامان میں طالبان کی مبینہ مداخلت اور کرپشن سے اصل مستحقین تک مدد نہیں پہنچی، اور عوام کی بنیادی ضروریات کو نظر انداز کیا گیا۔ 

امریکی اسپیشل انسپکٹر جنرل فار افغانستان ری کنسٹرکشن (SIGAR) کی رپورٹوں میں امدادی سرگرمیوں میں 150 مداخلتوں میں سے 95 فیصد طالبان حکومت سے منسلک بتائی گئی ہیں۔

2025 تک افغان عوام کے لیے دی جانے والی بین الاقوامی امداد 10.72 ارب ڈالر رہی، جس میں 3.83 ارب ڈالر امریکا کی جانب سے فراہم کیے گئے، جبکہ 293 ملین ڈالر دہشت گرد نیٹ ورکس کے قبضے میں چلے گئے۔

 کرپشن اور بدانتظامی کے الزامات کے بعد امریکا نے افغانستان کے لیے تمام امداد مکمل طور پر معطل کر دی ہے، اور انسانی صورتحال بدستور سنگین ہے۔