وزیراعلیٰ پنجاب کی ترقیاتی منصوبوں اور صاف پانی سکیم کی بروقت تکمیل کی ہدایت

لاہور: وزیراعلیٰ پنجاب مریم نواز نے عوام کو سڑکوں میں جاری کھدائی کی وجہ سے ہونے والی تکلیف پر معذرت کرتے ہوئے ترقیاتی منصوبوں کی بروقت تکمیل کی ہدایات دی ہیں۔

وزیراعلیٰ نے تین گھنٹے جاری خصوصی اجلاس میں پنجاب ڈویلپمنٹ پروگرام، لاہور ڈویلپمنٹ پروگرام، مثالی گاؤں، پی ایچ اے، صاف پانی اور دیہی روڈ منصوبوں پر پیشرفت کا جائزہ لیا۔

انہوں نے ہدایت کی کہ واٹر فلٹریشن اور واٹر بوٹلنگ پلانٹس کی تعمیر و بحالی 30 جون تک مکمل کی جائے اور ڈیرہ غازی خان، خوشاب، رحیم یار خان اور بہاولپور میں عوام کو گھر کی دہلیز پر صاف پانی فراہم کیا جائے۔

 لاہور کینال کی صفائی اور بارش کے بعد پانی کے نکاس کے اہداف بھی مقرر کیے گئے ہیں۔

اجلاس میں بتایا گیا کہ 1529 روڈ بحالی منصوبوں کے تحت 4031 کلومیٹر سڑکوں کی تعمیر و مرمت ہوگی۔

 مثالی گاؤں پراجیکٹ کے تحت 224 دیہات میں کام شروع ہو چکا ہے جبکہ 469 دیہات میں واٹر سپلائی، چلڈرن پارکس اور سٹریٹ لائٹس نصب کی جائیں گی۔

 وزیراعلیٰ نے منصوبوں کی مؤثر نگرانی کے لیے لائیو ڈیش بورڈ قائم کرنے کی بھی ہدایت دی۔

لاہور ڈویلپمنٹ پراجیکٹ کے پہلے فیز کی تکمیل اور دوسرے فیز کو 30 اپریل تک مکمل کرنے کی ہدایت دی گئی، جبکہ پی ایچ اے کی مالی خودمختاری اور اثاثوں کی تفصیلات طلب کرتے ہوئے ریسورس جنریشن پلان بنانے کی ہدایت بھی کی گئی۔

وزیراعلیٰ نے کہا کہ "اپنی چھت، اپنا گھر" پراجیکٹ کی دوسری قسط جاری کی جا رہی ہے اور روزانہ 700 مکانات تعمیر ہو رہے ہیں۔ 

52 شہروں میں 204 ارب روپے کے تعمیر و مرمت منصوبے 22 فروری تک شروع ہوں گے، جبکہ ویسٹ واٹر ٹریٹمنٹ پلانٹس، فلٹر پلانٹس اور واٹر فلٹریشن پلانٹس 30 جون تک مکمل کیے جائیں گے۔