نینا گپتا: میں آج کی ہیروئنز سے بہتر کام کر سکتی تھی، مگر اپنی غلطیوں کی وجہ سے عروج نہ پا سکی

بالی ووڈ کی سینئر اداکارہ نینا گپتا نے اپنے کیریئر کے بارے میں ایک بھارتی میڈیا ادارے کو انٹرویو دیتے ہوئے کہا کہ وہ اپنے عروج کے زمانے میں آج کی کئی ہیروئنز کے مقابلے میں زیادہ اچھی نظر آتی تھیں اور بہتر کام کر سکتی تھیں۔

1980 کی دہائی میں اپنے کیریئر کا آغاز کرنے والی 66 سالہ اداکارہ نے افسوس کا اظہار کیا کہ انہوں نے کبھی کمرشل ہندی فلموں میں ہیروئن کا کردار ادا نہیں کیا۔

 تاہم ان کا کیریئر طویل اور شاندار رہا، جس میں سینما، 1990 کی دہائی میں کیبل ٹی وی، اور حالیہ کمرشل فلمیں شامل ہیں۔

نینا نے کہا کہ وہ اکثر سوچتی ہیں کہ آج کی ہیروئنز کے مقابلے میں شاید وہ بہتر کام کر سکتی تھیں، مگر اس بات کا اب کوئی فائدہ نہیں۔ 

انہوں نے اپنی کامیابی نہ حاصل کرنے کی وجوہات بتاتے ہوئے کہا کہ یہ ان کی اپنی غلطی تھی، کیونکہ وہ صبر سے کام نہیں لیتی تھیں، خود پر اعتماد کم تھا، اور رہنمائی کے لیے کوئی موجود نہیں تھا۔

اداکارہ نے بتایا کہ بالآخر انہیں یہ سمجھ آیا کہ یہ انڈسٹری ایک بزنس ہے، جس میں جذبات کی جگہ اصول اور کھیل کے قوانین اہم ہیں۔

نینا گپتا کی ابتدائی فلموں میں گاندھی اور جانے بھی دو یارو شامل ہیں، جبکہ انہوں نے کامیڈی اور سپورٹنگ رولز بھی کیے۔

 ٹی وی پر وہ مرزا غالب اور سانس میں نمایاں رہیں۔

 2018 کی ہٹ فلم بدھائی ہو سے ان کے کیریئر کا دوبارہ آغاز ہوا اور حال ہی میں انہوں نے تو میری میں تیرا میں کام کیا۔ 

مستقبل قریب میں وہ ودھ 2 میں سنجے مشرا کے ساتھ نظر آئیں گی، جو 6 فروری کو ریلیز ہوگی۔