تربیتی مشن کے دوران تائیوان کا ایف-16 لڑاکا طیارہ حادثے کا شکار، پائلٹ لاپتہ

تائیوان کے مشرقی ساحلی علاقے کے قریب ایک ایف-16 لڑاکا طیارہ تربیتی پرواز کے دوران حادثے کا شکار ہو کر تباہ ہو گیا، جبکہ پائلٹ تاحال لاپتہ ہے۔

تائیوان کی سرکاری خبر رساں ایجنسی کے مطابق حادثے کے فوراً بعد پائلٹ کی تلاش کے لیے ریسکیو آپریشن شروع کر دیا گیا ہے۔

 تائیوانی فضائیہ کا کہنا ہے کہ طیارہ معمول کے تربیتی مشن پر تھا کہ اچانک حادثہ پیش آیا۔

ابتدائی اطلاعات کے مطابق امکان ظاہر کیا جا رہا ہے کہ پائلٹ ہولین کاؤنٹی کے قریب طیارے سے نکلنے میں کامیاب ہو گیا تھا، تاہم اس حوالے سے تاحال کوئی باضابطہ تصدیق سامنے نہیں آئی۔

تائیوان کے صدر ولیم لائی چنگ تے نے متعلقہ اداروں کو ہدایت دی ہے کہ پائلٹ کی فوری تلاش کو یقینی بنایا جائے اور حادثے کی وجوہات جاننے کے لیے مکمل اور شفاف تحقیقات کی جائیں۔

صدر کا کہنا تھا کہ ریسکیو اور تحقیقاتی کارروائیوں میں کسی بھی قسم کی غفلت یا کوتاہی برداشت نہیں کی جائے گی۔