سیکیورٹی خدشات: بنگلادیش نے بھارت میں اہم سفارتی مشنز کی ویزا سروس معطل کر دی

بنگلادیش کی عبوری حکومت نے سیکیورٹی خدشات کے باعث بھارت میں قائم اپنے اہم سفارتی مشنز، جن میں نئی دہلی کا ہائی کمیشن بھی شامل ہے، کو ویزا سروسز عارضی طور پر معطل کرنے کی ہدایت جاری کر دی ہے۔

 اس فیصلے کو دونوں ممالک کے درمیان جاری کشیدگی میں مزید اضافے کی علامت قرار دیا جا رہا ہے۔

بنگلادیش کے امورِ خارجہ کے مشیر ایم توحید حسین نے میڈیا کو بتایا کہ سیکیورٹی صورتحال کے پیشِ نظر بھارت میں موجود تین سفارتی مشنز میں ویزا خدمات وقتی طور پر روک دی گئی ہیں، تاہم ممبئی اور چنئی میں واقع بنگلادیشی مشنز میں ویزا سروسز معمول کے مطابق جاری رہیں گی۔

یاد رہے کہ بھارت نے بھی 5 اگست 2024 کے بعد سیکیورٹی خدشات کے تحت بنگلادیشی شہریوں کے لیے ویزا پابندیاں عائد کی تھیں۔

 دونوں ممالک کے تعلقات جولائی اور اگست 2024 میں طلبہ کی قیادت میں ہونے والے پُرتشدد احتجاج اور اس کے نتیجے میں سابق وزیراعظم شیخ حسینہ کی حکومت کے خاتمے کے بعد سے مسلسل دباؤ کا شکار ہیں۔