ہم جنگ اور مذاکرات دونوں کے لیے تیار ہیں، حالات پر قابو پا لیا گیا ہے: ایرانی وزیر خارجہ عباس عراقچی

تہران: ایران کے وزیر خارجہ عباس عراقچی نے کہا ہے کہ ایران جنگ اور مذاکرات دونوں کے لیے تیار ہے اور غیر ملکی عناصر کی مداخلت سے پیدا ہونے والی صورتحال پر قابو پا لیا گیا ہے۔

تہران میں غیر ملکی سفارتکاروں سے خطاب کرتے ہوئے عباس عراقچی نے کہا کہ ملک میں شروع ہونے والے احتجاجات ابتدا میں پرامن تھے، جن کے بعد حکومت نے مظاہرین کے جائز مطالبات سن کر اقتصادی اصلاحات کا آغاز کیا۔

 ان کے مطابق دسمبر کے اختتام تک احتجاج کمزور رہے تاہم جنوری کے آغاز میں حالات نے نیا رخ اختیار کیا اور غیر ملکی عناصر و دہشت گرد گروہوں کی مداخلت سے مظاہرے پرتشدد اور خونریز بن گئے۔

ایرانی وزیر خارجہ نے کہا کہ بعض مظاہرین کو ہتھیار فراہم کیے گئے اور انہوں نے نہ صرف سکیورٹی اہلکاروں بلکہ عام شہریوں کو بھی نشانہ بنایا۔ ان کا کہنا تھا کہ اس تشدد کا مقصد جانی نقصان بڑھا کر امریکا کو مداخلت کا جواز فراہم کرنا تھا، جبکہ امریکی صدر ڈونلڈ ٹرمپ کی دھمکیوں نے تشدد کو مزید ہوا دی۔

عباس عراقچی کے مطابق داعش اور دیگر دہشت گرد عناصر نے سکیورٹی اہلکاروں کو قتل کیا، بعض کے گلے کاٹے گئے اور کچھ کو زندہ جلا دیا گیا۔ 

اس دوران سرکاری و نجی املاک کو شدید نقصان پہنچایا گیا، جن میں دکانیں، ہسپتال، بسیں اور 350 مساجد شامل ہیں۔ انہوں نے بتایا کہ زخمیوں کو بھی نشانہ بنایا گیا اور کئی افراد کو خطیر رقوم دے کر پولیس اسٹیشنوں اور دیگر حساس مقامات پر حملوں کے لیے استعمال کیا گیا۔

انہوں نے کہا کہ حکومت نے سکیورٹی فورسز تعینات کر کے دہشت گرد عناصر کے خلاف مؤثر کارروائیاں کیں، متعدد افراد کو گرفتار کیا گیا جن کے قبضے سے اسلحہ برآمد ہوا۔ ان کے بقول گرفتار افراد کے اعترافی بیانات اور شواہد جلد عوام کے سامنے پیش کیے جائیں گے اور تمام ملوث عناصر کے خلاف سخت کارروائی کی جائے گی۔

ایرانی وزیر خارجہ نے کہا کہ مظاہروں میں شامل تقریباً 70 فیصد افراد کو غیر ملکی عناصر نے اکسانے کی کوشش کی، جبکہ 30 فیصد مظاہرین پرامن تھے اور ان کے مطالبات جائز تھے۔ حکومت پرامن مظاہرین کے مطالبات تسلیم کرتی ہے اور ان کے لیے قانونی و عدالتی راستے کھلے رکھے گئے ہیں۔

انہوں نے مزید کہا کہ ایران کی سکیورٹی اور استحکام کو یقینی بنا دیا گیا ہے اور جلد انٹرنیٹ سروس بحال کر دی جائے گی تاکہ سرکاری ادارے اور سفارتخانے معمول کے مطابق کام کر سکیں۔

آخر میں عباس عراقچی نے سفارتکاروں اور عوام کا صبر و استقامت پر شکریہ ادا کرتے ہوئے کہا کہ حکومت نے صورتحال پر مکمل کنٹرول حاصل کر لیا ہے اور پرامن مظاہرین کے تحفظ کو یقینی بنایا جائے گا۔