ٹانک: پولیس کی بکتر بند گاڑی پر آئی ای ڈی حملہ، ایس ایچ او سمیت 6 اہلکار شہید

ٹانک: خیبر پختونخوا کے ضلع ٹانک میں گومل کے علاقے میں پولیس کی بکتر بند گاڑی پر آئی ای ڈی بم حملہ کیا گیا، جس کے نتیجے میں ایس ایچ او سمیت 6 پولیس اہلکار شہید ہو گئے۔

پولیس کے مطابق دھماکہ ٹانک کے علاقے کوٹ ولی سے تقریباً 25 کلومیٹر کے فاصلے پر پیش آیا۔ حملے کے باعث پولیس کی بکتر بند گاڑی مکمل طور پر تباہ ہو گئی۔

ابتدائی اطلاعات کے مطابق شہید ہونے والوں میں اسحاق (ایس ایچ او)، اے ایس آئی شیر عالم، شفیع، حضرت علی، احسان اللہ اور ڈرائیور مجید شامل ہیں۔

 واقعے کی اطلاع ملتے ہی ریسکیو 1122 کی ٹیمیں جائے وقوعہ پر پہنچ گئیں اور شہداء و زخمیوں کو ہسپتال منتقل کیا جا رہا ہے۔

پولیس کے مطابق بکتر بند گاڑی گومل سے ٹانک کی جانب آ رہی تھی کہ راستے میں آئی ای ڈی دھماکہ کیا گیا۔ سکیورٹی فورسز نے موقع پر پہنچ کر علاقے کو گھیرے میں لے لیا اور سرچ آپریشن شروع کر دیا ہے۔

دوسری جانب اورکزئی کے علاقے یخ کنڈاؤ میں امن لشکر پر دہشت گردوں کے حملے میں 2 افراد جاں بحق اور 3 زخمی ہو گئے۔ ایس ڈی پی او محبوب خان کے مطابق امن لشکر کی جوابی کارروائی میں 3 دہشت گرد بھی مارے گئے۔

صدرِ مملکت آصف علی زرداری نے ٹانک میں دہشت گرد حملے میں پولیس اہلکاروں کی شہادت پر گہرے رنج و غم کا اظہار کرتے ہوئے شہداء کی بہادری اور قربانی کو خراجِ تحسین پیش کیا۔

وزیراعظم شہباز شریف نے شہداء کے لیے دعائے مغفرت اور لواحقین کے لیے صبر و استقامت کی دعا کرتے ہوئے واقعے کی فوری تحقیقات کا حکم دے دیا۔ 

انہوں نے کہا کہ واقعے میں ملوث دہشت گردوں کو جلد ان کے منطقی انجام تک پہنچایا جائے گا اور حکومت ملک سے دہشت گردی کے مکمل خاتمے کے لیے پُرعزم ہے۔