پاکستان کے نئے کرنسی نوٹ: چھپائی کی تیاری مکمل، حتمی ڈیزائن کی منظوری کا انتظار

پاکستان کے نئے کرنسی نوٹوں کی چھپائی کے لیے تمام انتظامات مکمل کر لیے گئے ہیں تاہم اسٹیٹ بینک کو تاحال حکومت کی جانب سے حتمی ڈیزائن کی منظوری کا انتظار ہے۔

سکیورٹی پرنٹنگ کارپوریشن آف پاکستان (SPC) کے مطابق نئی کرنسی جدید اور عالمی معیار کے سکیورٹی فیچرز کے ساتھ تیار کی جائے گی، تاہم نوٹوں کے حتمی ڈیزائن ابھی تک موصول نہیں ہوئے۔

 حکام کا کہنا ہے کہ ڈیزائن ملنے کے بعد نئی کرنسی کی چھپائی میں کم از کم دو ماہ کا وقت درکار ہوگا، جبکہ جدید پرنٹنگ مشینری پہلے سے دستیاب ہے۔

سینئر منیجر پرنٹنگ عامر شمس کے مطابق اسٹیٹ بینک اور سکیورٹی پرنٹنگ کارپوریشن کے درمیان نئی کرنسی کی چھپائی سے متعلق مشاورت ہو چکی ہے۔ 

ان کا کہنا تھا کہ نئی کرنسی کے ڈیزائن مرحلہ وار جاری ہوں گے یا ایک ساتھ، اس پر بھی اسٹیٹ بینک میں غور کیا جا رہا ہے، جبکہ رواں سال نئی کرنسیوں کی چھپائی کے لیے ٹائم لائن دی جا سکتی ہے۔

ذرائع اسٹیٹ بینک کے مطابق نئے ڈیزائن والے کرنسی نوٹوں کی چھپائی کا باقاعدہ آرڈر وفاقی کابینہ کی منظوری کے بعد ہی جاری کیا جائے گا۔

 حکام کا کہنا ہے کہ مجوزہ ڈیزائن شارٹ لسٹ کرکے حکومت کو ارسال کر دیے گئے ہیں اور کابینہ کی منظوری کے بعد 2026ء کے آخری مہینوں میں نئی کرنسی کے اجراء کا امکان ہے۔