وزیراعظم شہباز شریف کے دور میں ڈھانچہ جاتی اصلاحات پر عملی عملدرآمد شروع ہو گیا‘اسحاق ڈار

نائب وزیراعظم اسحاق ڈار نے کہا ہے کہ ملک میں برسوں سے زیرِ غور ڈھانچہ جاتی اصلاحات کو وزیراعظم شہباز شریف کی قیادت میں عملی شکل دی گئی

اسلام آباد میں پاکستان پالیسی ڈائیلاگ سے خطاب کرتے ہوئے انہوں نے کہا کہ پی آئی اے کی نجکاری دو دہائیوں کی کوششوں کے بعد ممکن ہوئی، جبکہ گردشی قرضوں میں کمی، رائٹ سائزنگ اور گورننس میں بہتری حکومت کی اہم ترجیحات ہیں۔

اسحاق ڈار نے کہا کہ ڈیجیٹائزیشن کے ذریعے وسائل کے شفاف اور عوام کے مفاد میں استعمال کو یقینی بنایا جا رہا ہے۔

 انہوں نے بتایا کہ مئی 2023 میں فچ کی رپورٹ کے مطابق پاکستان ایک ماہ کے اندر ڈیفالٹ کے خطرے سے دوچار تھا، تاہم حکومت نے آئی ایم ایف کو واضح پیغام دیا کہ پاکستان ڈیفالٹ نہیں کرے گا، اور یہ مؤقف درست ثابت ہوا۔

ان کا کہنا تھا کہ حکومت کا کام کاروبار کرنا نہیں بلکہ سہولت فراہم کرنا ہے، نجکاری سے مثبت نتائج سامنے آئے ہیں، معاشی حالات میں بہتری آئی ہے، پاکستان اسٹاک ایکسچینج نے نئی تاریخ رقم کی ہے، کرنٹ اکاؤنٹ خسارہ سرپلس میں تبدیل ہو چکا ہے اور غربت میں بھی کمی آئی ہے۔