پاکستان کا ایران کی قیادت اور عوام پر اعتماد، خطے میں امن و خوشحالی کی خواہش

اسلام آباد – پاکستان نے ایران کی قیادت اور عوام پر اعتماد کا اظہار کرتے ہوئے کہا ہے کہ وہ خطے میں امن، خوشحالی اور استحکام چاہتے ہیں۔

وزارت خارجہ کے ترجمان طاہر حسین اندرابی نے ہفتہ وار بریفنگ میں کہا کہ پاکستان ایران کے موجودہ بحران کے پرامن حل کا خواہاں ہے اور امن کے لیے اپنا کردار جاری رکھے گا۔

 انہوں نے کہا کہ ایران خطے کا اہم ملک ہے اور پاکستان امید کرتا ہے کہ ایران جلد اپنے بحران پر قابو پا لے گا۔

ترجمان نے امریکی ویزا پابندیوں پر بھی کہا کہ پاکستان امریکی حکام کے ساتھ رابطے میں ہے اور امید ہے کہ ویزے جلد بحال ہو جائیں گے۔ 

ایران سے تجارت عالمی قوانین کے مطابق جاری ہے اور امریکہ کے 25 فیصد ٹیرف کے اعلان پر جائزہ لیا جا رہا ہے۔

ترجمان نے بھارتی فوجی چیف کے بیانات کو مسترد کرتے ہوئے کہا کہ یہ بے بنیاد ہیں اور مقبوضہ کشمیر میں مظالم جاری ہیں، جبکہ بھارت میں اقلیتوں پر ظلم و جبر عیاں ہے۔

نائب وزیراعظم اور وزیر خارجہ نے او آئی سی کے اجلاس میں فلسطین اور کشمیر کے معاملات اجاگر کیے اور ازبکستان، بنگلہ دیش، مالدیپ، مصر اور سعودی عرب کے ہم منصبوں سے ملاقاتیں کیں۔

 وزیراعظم شہبازشریف نے قطر کے امیر سے بات کی، جبکہ صدر آصف علی زرداری بحرین کے دورے پر ہیں تاکہ دوطرفہ اور عالمی امور پر تبادلہ خیال کیا جا سکے۔

پاکستان نے فلسطین اور کشمیر کے حقِ خود ارادیت کے موقف کو برقرار رکھا اور اسرائیل کی جانب سے صومالی لینڈ کو تسلیم کرنے کی شدید مذمت کی۔