خیبر پختونخوا میں سیکیورٹی فورسز کی کامیاب کارروائیاں، 13 بھارتی حمایت یافتہ خارجی ہلاک

خیبر پختونخوا کے مختلف علاقوں میں سیکیورٹی فورسز نے خفیہ اطلاعات کی بنیاد پر دو الگ الگ کارروائیاں کرتے ہوئے 13 بھارتی حمایت یافتہ خارجیوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق بنوں میں کی گئی کارروائی کے دوران سیکیورٹی فورسز نے خارجیوں کے ٹھکانوں کو مؤثر انداز میں نشانہ بنایا، جس کے نتیجے میں 8 دہشت گرد ہلاک ہو گئے۔

آئی ایس پی آر کے مطابق ضلع کرم میں دوسری کارروائی کے دوران مزید 5 خارجیوں کو ہلاک کیا گیا۔ فورسز نے کارروائی کے دوران دہشت گرد عناصر کے خلاف بھرپور اور مؤثر حکمتِ عملی اختیار کی۔

آئی ایس پی آر کا کہنا ہے کہ یہ کارروائیاں علاقے میں امن و امان کو یقینی بنانے اور دہشت گرد نیٹ ورکس کے خاتمے کے لیے کی گئیں۔