وزیراعظم شہباز شریف: دہشتگردی کا خاتمہ، غربت اور بے روزگاری کے خلاف قومی اتحاد کی ضرورت

وزیراعظم محمد شہباز شریف نے قومی پیغامِ امن کمیٹی کے ارکان سے گفتگو میں ملک سے دہشتگردی، غربت اور بے روزگاری کے خاتمے کے عزم کا اعادہ کیا۔

 انہوں نے کہا کہ دہشتگردی کو پاکستان کی سرحدوں سے اٹھا کر بحرِ ہند میں ڈبو دیا جائے گا اور ملک میں قومی اتحاد اور یکجہتی آج پہلے سے کہیں زیادہ ضروری ہے۔

وزیراعظم نے پاکستان کو اللہ کی عظیم نعمت اور وسیع قدرتی وسائل سے مالا مال قرار دیتے ہوئے کہا کہ ان وسائل کے مؤثر استعمال سے ملک کے تمام مسائل حل کیے جا سکتے ہیں۔

 حکومت عوام کو روزگار فراہم کرنے، قرضوں سے نجات اور حقیقی فلاحی ریاست بنانے کے لیے بھرپور اقدامات کر رہی ہے۔

انہوں نے تمام مذاہب کے افراد کو آزادی کے ساتھ عبادت اور تہوار منانے کی ضمانت دی اور کہا کہ اقلیتی برادری نے تحریک پاکستان اور ملکی ترقی میں اہم کردار ادا کیا ہے۔

وزیراعظم نے افواج پاکستان کی دہشتگردی کے خلاف کامیابی کو اللہ کی نصرت، عوام کی دعاؤں اور افواج کی پیشہ ورانہ صلاحیتوں کا نتیجہ قرار دیا اور کہا کہ ایک لاکھ سے زائد پاکستانی قربانیاں دے چکے ہیں، جو رائیگاں نہیں جائیں گی۔

کمیٹی کے کنوینر مولانا طاہر اشرفی نے کہا کہ امن، برداشت اور اعتدال کے پیغام کو ملک بھر میں عام کرنے کے لیے علما کرام بھرپور کردار ادا کریں گے اور اقلیتیں بھی حکومت اور افواج کے ساتھ مکمل یکجہتی کا اظہار کرتی ہیں۔