قومی پیغامِ امن کمیٹی کا کردار نہایت اہم، دہشتگردی کو جڑ سے اکھاڑ پھینکیں گے: وزیراعظم

 وزیراعظم شہباز شریف نے کہا ہے کہ اس وقت ملک میں قومی پیغامِ امن کمیٹی کا کردار انتہائی اہم ہے اور اس پلیٹ فارم کے ذریعے اتحاد، رواداری اور ہم آہنگی کو فروغ دیا جا سکتا ہے۔

قومی پیغامِ امن کمیٹی کے اراکین سے خطاب کرتے ہوئے وزیراعظم نے کہا کہ قیامِ پاکستان میں علما کرام اور اقلیتی برادری نے بھرپور کردار ادا کیا جبکہ آزادی کے وقت لاکھوں لوگوں نے وطن کی خاطر قربانیاں دیں۔

 پاکستان کے قیام کا مقصد یہ تھا کہ بلا امتیاز سب کو برابر حقوق حاصل ہوں۔

وزیراعظم نے کہا کہ پاکستان ترقی اور خوشحالی کی جانب گامزن ہے اور اللہ تعالیٰ نے پاکستان کو بے پناہ قدرتی وسائل سے نوازا ہے جن کی مالیت کھربوں ڈالرز میں ہے، ان وسائل سے غربت اور بے روزگاری ختم کی جا سکتی ہے اور قرضوں سے نجات حاصل کی جا سکتی ہے۔

مئی 2025 میں پیش آنے والے معرکے میں افواجِ پاکستان نے بھارت کو شکست دی، جس کی قیادت فیلڈ مارشل سید عاصم منیر نے کی۔

وزیراعظم نے کہا کہ آج پاکستان کو سب سے بڑا چیلنج دہشتگردی کا سامنا ہے۔ 

دہشتگردی کے خلاف جنگ میں ایک لاکھ پاکستانی شہید ہو چکے ہیں اور چاروں صوبوں کے شہداء نے اپنی قربانی سے وطن کی آبیاری کی ہے۔

 پاکستان نے نہ صرف خود قربانیاں دیں بلکہ دنیا کو بھی دہشتگردی سے محفوظ رکھنے میں کردار ادا کیا۔

انہوں نے کہا کہ ٹی ٹی پی اور ٹی ٹی اے کے درمیان گٹھ جوڑ موجود ہے اور ان کے خلاف تمام شواہد ہمارے پاس ہیں۔

 دشمن عناصر دہشتگرد تنظیموں کو وسائل فراہم کر رہے ہیں، تاہم ماضی کی طرح آج بھی دہشتگردی کو جڑ سے اکھاڑ پھینکا جائے گا، اور دہشتگردوں کو پاکستان کی سرحدوں سے اٹھا کر بحرِ ہند میں ڈبو دیا جائے گا۔

وزیراعظم نے مزید کہا کہ آج قومی اتحاد اور یکجہتی کی ضرورت پہلے سے کہیں زیادہ ہے۔ پیچیدہ قومی مسائل کو مل بیٹھ کر حل کرنا ہوگا تاکہ پاکستان امن، ترقی اور خوشحالی کی راہ پر تیزی سے آگے بڑھتا رہے۔