امریکا میں تاریخ رقم، پہلی مسلم خاتون نے قرآن پر ورجینیا کی نائب گورنر کا حلف اٹھا لیا

امریکا کی ریاست ورجینیا میں ایک تاریخی لمحہ اس وقت دیکھنے میں آیا جب پہلی مسلم خاتون غزالہ ہاشمی نے قرآنِ پاک پر نائب گورنر کے عہدے کا حلف اٹھا لیا۔

اس تاریخی تقریب کو امریکا میں مذہبی اور ثقافتی تنوع کی ایک نمایاں مثال قرار دیا جا رہا ہے۔

اسی تقریب میں ورجینیا کی تاریخ میں پہلی مرتبہ ایک خاتون ایبی گیل اسپین برجر نے گورنر کے عہدے کا حلف سنبھالا، جبکہ پہلی بار سیاہ فام رہنما جے جونز نے اٹارنی جنرل کے منصب کی ذمہ داریاں سنبھالیں۔

غزالہ ہاشمی نہ صرف ورجینیا کی پہلی مسلم نائب گورنر ہیں بلکہ وہ اس عہدے پر فائز ہونے والی پہلی خاتون بھی ہیں۔ حلف برداری کے موقع پر انٹرفیتھ پریئر بریک فاسٹ کا اہتمام کیا گیا، جہاں امام شریف نے دعا کرائی۔

تقریب میں مختلف سیاسی، سماجی اور کمیونٹی رہنماؤں نے شرکت کی، جن میں سینیٹر صدام ازلان سلیم، سینیٹر کنعان اور دیگر نمایاں شخصیات شامل تھیں۔

 اس موقع پر ایڈمز اسکاؤٹنگ امریکا اور گرلز اسکاؤٹس کی جانب سے پریڈ بھی نکالی گئی، جس کی قیادت رضوان جاکا، احسن اللہ، بیتھنی رشید اور دیگر نے کی۔

تقریب سے خطاب کرتے ہوئے رضوان جاکا نے امید ظاہر کی کہ ورجینیا میں اتحاد، شمولیت اور تنوع کو مزید فروغ ملے گا، جبکہ گورنر کے ایشین امریکن ایڈوائزری بورڈ کے چیئر منصور قریشی نے کہا کہ نئی قیادت بلا امتیاز تمام شہریوں، خصوصاً جنوبی ایشیائی کمیونٹی کی خدمت کرے گی۔