کراچی میں جعلی ایف بی آر اور پی ایس کیو سی اے ٹیموں کے دکانوں پر چھاپوں کا انکشاف، تاجروں نے شکایت درج کرائی

اسلام آباد: کراچی کے جوڑیا بازار میں کچھ افراد نے خود کو فیڈرل بورڈ آف ریونیو (FBR) اور پاکستان اسٹینڈرڈ کوالٹی کنٹرول اتھارٹی (PSQCA) کے افسر ظاہر کر کے تاجروں کی دکانوں پر چھاپے مارے اور انہیں ہراساں کیا، جس کا انکشاف ہوا ہے۔

متاثرہ تاجر سہیل قادری نے چیئرمین ایف بی آر کو خط لکھا اور کہا کہ 31 جنوری کو شام تقریباً چار بجے، دس سے بارہ افراد نے ان کی دکان میں داخل ہو کر مصنوعات پھینکیں، نقصان پہنچایا اور پیداواری سرٹیفکیٹس مانگنا شروع کیے۔ 

جب ان سے شناخت طلب کی گئی تو انہوں نے خود کو ایف بی آر اور پی ایس کیو سی اے کے افسر ظاہر کیا، مگر دفتری کارڈز نہ دکھا سکے اور دھمکیاں دینے لگے۔

 تین افراد پولیس اہلکار بھی تھے جنہوں نے خود کو میٹھا در پولیس اسٹیشن سے بتایا۔

تاجر نے مزید کہا کہ یہ کارروائی قانونی و تحریری اجازت کے بغیر کی گئی، جس سے یہ شبہ پیدا ہوتا ہے کہ یہ افراد سرکاری اداروں کے نام کا ناجائز استعمال کر رہے تھے اور اداروں کی بدنامی کی کوشش کر رہے تھے۔ 

بعد ازاں، معلوم ہوا کہ یہ کارروائی ان کے کاروباری حریف کی جانب سے کرائی گئی۔

ایف بی آر اور پی ایس کیو سی اے حکام نے کسی بھی مشترکہ ٹیم کی جانب سے چھاپے کی تردید کی ہے، جبکہ پی ایس کیو سی اے نے معاملے کی چھان بین شروع کر دی ہے۔