ایران امریکا مذاکرات: پاکستان کو استنبول میں ہونے والے اہم سفارتی مذاکرات میں شرکت کی دعوت

ایران اور امریکا کے درمیان کشیدگی کم کرنے کے لیے ترکیے میں ہونے والے اہم مذاکرات میں پاکستان کو باضابطہ طور پر شرکت کی دعوت دی گئی ہے۔

دفترِ خارجہ کے ترجمان طاہر اندرابی نے تصدیق کرتے ہوئے بتایا کہ استنبول میں منعقد ہونے والے ایران اور امریکا کے مذاکرات میں پاکستان کو شامل ہونے کی دعوت موصول ہوئی ہے۔

ذرائع کے مطابق ان مذاکرات کا مقصد ایران اور امریکا کے درمیان بڑھتی ہوئی کشیدگی کا سفارتی حل تلاش کرنا ہے، جس میں پاکستان بھی تعمیری کردار ادا کرے گا۔

غیر ملکی خبر رساں ادارے رائٹرز کے مطابق ایران اور امریکا کے جوہری مذاکرات جمعے کو استنبول میں شروع ہوں گے۔ 

امریکا کی نمائندگی خصوصی ایلچی اسٹیو ویٹکوف جبکہ ایران کی جانب سے وزیر خارجہ عباس عراقچی مذاکرات میں شریک ہوں گے۔

مذاکرات کا مرکزی ایجنڈا ایرانی جوہری پروگرام سے متعلق تنازع کو سفارت کاری کے ذریعے حل کرنا اور خطے کو کسی نئی جنگ سے بچانا ہے۔

ذرائع نے مزید بتایا کہ ان مذاکرات میں پاکستان کے علاوہ سعودی عرب، قطر، مصر، عمان اور متحدہ عرب امارات کے وزرائے خارجہ کو بھی شرکت کی دعوت دی گئی ہے۔

یاد رہے کہ اس پیش رفت سے قبل امریکی صدر ڈونلڈ ٹرمپ ایران کو معاہدہ نہ ہونے کی صورت میں سخت نتائج کی وارننگ دے چکے ہیں، جبکہ امریکی بحری جہاز گزشتہ ماہ ایران کے قریب تعینات کیے جا چکے تھے۔