ایران عالمی طاقتوں کے دباؤ کے سامنے نہیں جھکے گا: صدر مسعود پزشکیان

ایران کے صدر مسعود پزشکیان نے واضح کیا ہے کہ ایران عالمی طاقتوں کے دباؤ کے سامنے ہرگز سر نہیں جھکائے گا اور ہر قسم کے چیلنج کا مقابلہ کرے گا۔

تہران میں ایرانی سرکاری ٹیلی ویژن پر نشر ہونے والے خطاب میں مسعود پزشکیان نے کہا کہ عالمی قوتیں ایران کو دباؤ میں لانے کے لیے متحد ہو رہی ہیں، تاہم ایرانی قوم تمام مشکلات اور آزمائشوں کا ڈٹ کر مقابلہ کرے گی۔

انہوں نے کہا کہ سخت معاشی اور سیاسی حالات کے باوجود ایران کسی بھی دباؤ کے آگے ہار نہیں مانے گا اور بالآخر کامیابی ایران کا مقدر ہوگی۔

دوسری جانب ایران نے یورپی یونین کی بری، بحری اور فضائی افواج کو دہشت گرد قرار دے دیا ہے۔

 یہ اقدام یورپی یونین کی جانب سے پاسدارانِ انقلاب کو دہشت گرد تنظیم قرار دینے کے ردعمل میں اٹھایا گیا۔

ایرانی وزیر خارجہ عباس عراقچی کے مطابق امریکا کے ساتھ ممکنہ جوہری مذاکرات کے بعد ایران چند روز میں اپنی جوابی تجویز پیش کر سکتا ہے۔

ادھر امریکی صدر ڈونلڈ ٹرمپ نے ایران کے خلاف محدود فوجی کارروائی پر غور کرنے کا عندیہ دیا ہے جبکہ برطانوی میڈیا رپورٹس میں دعویٰ کیا گیا ہے کہ ممکنہ امریکی حملوں میں ایرانی اہم شخصیات کو نشانہ بنایا جا سکتا ہے۔