26 نومبر احتجاج کیس: اسلام آباد کی عدالت نے پی ٹی آئی کے 30 کارکنان کو اشتہاری قرار دے دیا

انسداد دہشت گردی کی عدالت اسلام آباد نے 26 نومبر احتجاج کیس میں پی ٹی آئی کے 30 کارکنان کو اشتہاری قرار دے دیا ہے۔

عدالت میں پی ٹی آئی کارکنان کے خلاف مختلف تھانوں میں درج پانچ مقدمات کی سماعت ہوئی، جس میں تھانہ کھنہ کے کیس میں 30 ملزمان کو اشتہاری قرار دیا گیا۔

 سابقہ سماعت میں 31 پی ٹی آئی کارکنان کے خلاف اشتہاری کارروائی شروع کی گئی تھی، تاہم ایک کارکن کے پیش ہونے پر اس پر کارروائی ختم کردی گئی۔

عدالت نے تھانہ کھنہ کے مقدمے کی اگلی سماعت 2 اپریل، تھانہ مارگلہ کی سماعت 4 اپریل اور تھانہ کوہسار کی سماعت 26 مارچ تک ملتوی کر دی۔ 

تھانہ ترنول اور آبپارہ کے مقدمات کی سماعت 10 مارچ تک ملتوی کی گئی۔

پولیس ریکارڈ کی عدم دستیابی کے باعث آج کسی مقدمے میں شہادتیں ریکارڈ نہیں ہو سکیں۔

 پی ٹی آئی کارکنان کے خلاف دہشت گردی، توڑ پھوڑ اور دیگر دفعات کے تحت مقدمات درج ہیں۔