حج کے عمل کو مکمل طور پر ڈیجیٹل بنانے کا اہم اقدام

وزیراعظم شہباز شریف کی ہدایات پر حج کے تمام آپریشنز کو مکمل طور پر ڈیجیٹل بنانے کی جانب اہم قدم اٹھایا گیا ہے۔ 

وزارت مذہبی امور اور وزارت اطلاعات و ٹیکنالوجی کے درمیان حج کے ڈیجیٹل نظام کے لیے مفاہمت کی یادداشت پر دستخط کیے گئے۔

اس موقع پر وزیر مذہبی امور سردار محمد یوسف، وفاقی وزیر اطلاعات و ٹیکنالوجی شزا فاطمہ خواجہ، سیکرٹری مذہبی امور، سیکرٹری اطلاعات و ٹیکنالوجی اور دیگر اعلیٰ حکام موجود تھے۔ 

مشترکہ سیکرٹری حج محمد بخش سانگی اور نیشنل بورڈ برائے معلوماتی ٹیکنالوجی کے ڈائریکٹر جنرل ڈاکٹر خالد رفیق نے یادداشت پر دستخط کیے۔

سردار محمد یوسف نے تقریب سے خطاب کرتے ہوئے کہا کہ وزیراعظم کی ہدایات کے مطابق حج کے عمل کو مزید شفاف اور آسان بنایا جا رہا ہے۔ 

اس نئے نظام سے غیر ضروری تاخیر اور انسانی غلطیوں کا خاتمہ ہوگا اور بین الاقوامی معیار کے حصول میں مدد ملے گی۔

وفاقی وزیر شزا فاطمہ خواجہ نے کہا کہ آئندہ سال درخواست جمع کروانے سے لے کر وطن واپسی تک مکمل ڈیجیٹل نظام متعارف کرایا جائے گا، اور زائرین کے لیے سادہ اور آسان فہم آن لائن پورٹل قائم کیا جائے گا۔

مفاہمت کی یادداشت کے تحت پاک حج موبائل ایپ کو مزید بہتر اور آسان بنایا جائے گا، اور پورٹل کے ذریعے تمام متعلقہ اداروں کے درمیان مؤثر رابطہ اور سعودی حکام کی وقت بندی کی پابندی یقینی بنائی جائے گی۔