بلوچستان میں دو کارروائیوں میں بھارتی حمایت یافتہ 15 دہشت گرد ہلاک

بلوچستان میں سکیورٹی فورسز کی دو الگ الگ کارروائیوں کے دوران بھارتی سرپرستی میں کام کرنے والے 15 دہشت گرد ہلاک کر دیے گئے۔

پاک فوج کے شعبہ تعلقات عامہ (آئی ایس پی آر) کے مطابق خفیہ اطلاعات کی بنیاد پر ایک کارروائی ضلع ہرنائی میں کی گئی جہاں فتنہ الخوارج سے تعلق رکھنے والے دہشت گردوں کی موجودگی کی اطلاع تھی۔

 کارروائی کے دوران سکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا اور شدید فائرنگ کے تبادلے کے بعد بھارت کے حمایت یافتہ 12 دہشت گرد ہلاک کر دیے گئے۔

دوسری کارروائی خفیہ اطلاعات کی بنیاد پر بسیمہ میں کی گئی جہاں فتنہ الہندوستان سے تعلق رکھنے والے دہشت گردوں کو نشانہ بنایا گیا۔

 اس کارروائی میں سکیورٹی فورسز نے مختلف ہتھیار استعمال کرتے ہوئے 3 دہشت گرد ہلاک کر دیے۔

آئی ایس پی آر کے مطابق ہلاک ہونے والے دہشت گردوں کے قبضے سے اسلحہ، گولہ بارود اور دھماکہ خیز مواد بھی برآمد ہوا ہے اور یہ عناصر مختلف دہشت گردانہ سرگرمیوں میں ملوث تھے۔

سکیورٹی فورسز کی جانب سے علاقے میں مزید دہشت گردوں کی موجودگی کے خدشے کے پیش نظر سرچ اور کلیئرنس آپریشن جاری ہیں۔

بیان کے مطابق نیشنل ایکشن پلان اور وژن عزمِ استحکام کے تحت دہشت گردی کے خلاف کارروائیاں جاری رہیں گی تاکہ بیرونی سرپرستی میں ہونے والی دہشت گردی کا مکمل خاتمہ کیا جا سکے۔