جنگ کے آٹھویں دن: ایرانی صدر نے پڑوسی ممالک پر مزید حملے نہ کرنے کا اعلان کر دیا

مشرق وسطیٰ میں جاری جنگ کے آٹھویں روز ایران پر امریکہ اور اسرائیل کی جانب سے مزید حملے کیے گئے، جن میں تہران کے مہرآباد ایئرپورٹ پر دھماکے شامل ہیں۔

 امریکی دعوے کے مطابق 43 ایرانی جنگی جہاز تباہ ہو گئے، جبکہ اسرائیل لبنان میں بھی بمباری کر رہا ہے۔ اب تک ایران میں 1,332 افراد شہید ہوئے، جن میں 198 خواتین اور 8 طبی عملے کے ارکان شامل ہیں۔

ایرانی صدر مسعود پزشکیان نے اعلان کیا کہ ایران پڑوسی ممالک پر مزید حملے نہیں کرے گا، جب تک کوئی دوسرا ملک حملہ نہ کرے۔ انہوں نے معذرت بھی کی اور کہا کہ عبوری لیڈر شپ کونسل نے پڑوسی ممالک کے خلاف کوئی حملہ یا میزائل حملہ کرنے کی منظوری نہیں دی۔

دریں اثنا ایران نے مقبوضہ فلسطین میں اہم اہداف کو نشانہ بنانے کے لیے میزائل اور ڈرون حملوں کی نئی لہر کا آغاز کیا اور ایرانی بحریہ نے یو ایس ایس ابرہام لنکن کو نشانہ بنانے کا اعلان کیا۔

 لبنان سے حزب اللہ نے اسرائیل پر راکٹ داغے، جس میں اسرائیلی وزیر خزانہ کے بیٹے سمیت 8 فوجی زخمی ہوئے۔

امریکی صدر ڈونلڈ ٹرمپ نے کہا کہ ایران سے غیر مشروط ہتھیار ڈالنے تک حملے جاری رہیں گے۔ ایران نے وضاحت کی کہ آبنائے ہرمز کھلا ہے، تاہم غیر مجاز امریکی یا اسرائیلی جہاز کو نشانہ بنایا جائے گا۔